Refereynen ende liedekens
(1563)–Anoniem Refereynen ende liedekens–
AuteursrechtvrijRijnsburch in Hollant.
| |
[Folio 103r]
| |
Hoe heeft de goede Gheuer alder dinghen,
Die Liefde tot alle sijn wercken cost dwinghen
Het menschelijck Gheslacht, hier eerst in ghestelt?
Ueurwaer wt eenen Mensche sachment volbringhen,
Die hy na alleene niet woude ghehinghen,
Als claerlijcken het Boeck Genesis vermelt,
De redene waerom: Augustinus vertelt,
Segghende, dat Godt daer door heeft willen toonen
D'aenghenaemheyt van Eendracht, en dat hem quelt
De Tweedracht van ons, die hier op eerden woonen.
En besunder dat Eendracht van veel persoonen
Hem zeer aenghenaem hier is bouen maten,
Soo moet Eendracht dan goet zijn? ia weert te croonen,
Besunder als Liefde haer comt te baten.
Uraecht ghy wie in rusten hout, Landen en Staten?
Ick salt v na mijn cranck verstant zijn wijsende,
Uolcomen Eendracht wt Liefden rijsende.
Alsoo lang als Eendracht niet en wert verdreuen,
Maer by Abel ende Cain is ghebleuen,
Soo langhe blijckt dat sy hadden Urede.
Tweedracht dede terstont den eenen sneuen,
Het welck oock Abel ghecost heeft sijn leuen,
Die daer sijn seluen Onrust deur aen dede,
Eendracht die hiel oock in Rusten mede
Den Godtvreesenden Noe, inden watervloet:
Abrahae dijsghelijcx tot menighe stede
Gaf Eendracht, Ruste, ende grooten veurspoet
Loth, scheyende van desen sijnen Broeder goet:
Aen Isaac en Iacob ist oock ghebleken,
Maer siet nu besonder wat dat sy doet?
| |
[Folio 103v]
| |
In Egypten daer Israel was gheweken:
Wie hiel haer Lant in Rusten? Ey wilt toch spreken,
Uoorwaer (deur Godt) die ick hier ben prijsende,
Uolcomen Eendracht wt Liefden rijsende.
T'ghinck den Israeliten wel zijnde gheset
In de Wildernis, daer sy ontfinghen de Wet,
Eendrachtelijck doen alle Twist was veracht:
Eenuoudich deden sy haer Offerhanden net,
Tot dat sy met twistinghe werden besmet,
So lang hadden Ruste, t'voorseyde Gheslacht.
Saul, en Dauid Coninghen van grooter macht,
Sy en haer Lant hebben in Rusten gheweest,
Soo lang als heur, en heur volck was Eendracht:
Diesghelijck men oock van Salomoni leest,
Oock by Iosia was deur Eendracht aldermeest
T'Uolck in Rusten, sy heylichden den Heere:
Nehemias met de sijne oock gherust zeere:
Siet deser Landt hiel gherust mijn cleyne Leere,
(Daer hem elck in moet zijn verjolijsende)
Uolcomen Eendracht wt Liefden rijsende.
| |
§ Prince.Wt Liefden Prins, moet dese eendracht spruyten,
En volcomen zijnde, soo sal sy besluyten
Dat de Landen in Rusten werden ghehouwen,
Want Liefde die mach het met haer al uyten,
Sy verdraghet al, Twist stelt sy buyten,
Op Tweedracht en sal sy niet betrouwen,
Dits d'Eendracht daer Christus gebiet op te bouwen
Want hy seyt, een tweedrachtich Rijck sal vergaen,
| |
[Folio 104r]
| |
Contrarie daer ghy Eendracht meucht aenschouwen
Moeten de Landen in alle Ruste staen:
By den Apostelen heeft Eendracht dit ghedaen,
Die een Herte ende eenen Sin waren:
Eens Ghemoets te zijn is oock Paulus vermaen,
En daer dit is, hebben de Landen welvaren,
Aldus blijf ick noch by mijn eerste verclaren,
Dat de Landen met Ruste meest is spijsende
Uolcomen Eendracht wt Liefden rijsende.
| |
§ Liedeken op den .xxic. Psalm,
| |
[Folio 104v]
| |
Aen Prijs en Eer,
Cost hy deur v gheraken,
[Noch sal hy meer]
[Werden van v al hier ghelaeft:]
Ghy sult hem Heer
U Liberalicheyt hier laten smaken,
En hem maken
Uerheucht deur uwe claer aenschijn soet
Sijn Hop' en Saken
Stelt hy op v O Heere goet:
Daerom vergaet niet sijnen veurspoet.
O Coninck vailiant,
U stercke Hant,
Sal hem wel vinden die v spijt aendoet.
Ghy sultse hier
Doen gloeyen als een Backers ouen:
Die daer met vier
Onsteken is van binnen,
Als ghy nu schier
U Gramschap toont van bouen.
[Quade manier]
Sult ghy toornich te vernielen beghinnen,
Heur tsvruchts winnen
Werdt gheroeyt hoe schoon dat opgaet:
En diet versinnen
En sullen niet meer sien heur Saet:
Want elck wou v betijden met quaet,
Neerstich en cloeck,
Deden sy versoeck,
Maer sy en mochten niet volbringhen de Daet.
| |
[Folio 105r]
| |
Ghy sultse van
Den anderen afscheyden,
Ende als dan,
Soo sal haer aensichte ghenieten,
Uoor alle man,
Dat ghy heur wout bereyden,
Want v Macht can,
Als inden Doel met Pijlen daer na schieten,
[Deur t'verdrieten,]
Laet Heer v macht dan nu rijsen:
Die v verlieten,
Wilt hier v Cracht bewijsen:
Soo sullen wy ons verjolijsen,
U Lof singhen // [van Ureucht opspringhen]
Ende met Liedekens v Moghentheyt prijsen.
| |
§ Responce, eenen Sin op de voorgaende Psalm, Exaudiat, xx.DE Heere sal
U verhooren inden benauden tijt,
En uwen Ual
Die sal sijn Heerlickheyt te hulpe comen,
Al in dit Dal,
Soo compt de Cracht die v bevrijt,
Heel ouer al
Wort sy nu hier vernomen,
T'sal v vromen,
Dat v tot Sion nu werdt ghedaen:
[Wilt nu niet schromen]
U Onderstant siet toch wel aen,
| |
[Folio 105v]
| |
Soo sal v voorts de Heer bijstaen,
In sijn ghedacht,
Sal hooch zijn gheacht,
U Offerande daer ghy mé wilt tot hem gaen.
Hy ist, die gheeft
Al dat v hert beghęren mach,
Die macht hy heeft
Sijn voornemen te volbringhen:
Wie niet en beeft:
Uerblijt v, want men Salicheyt nu sach:
Deur hem die leeft,
Worden wy groot, hy wilt dat ghehinghen.
Alle dinghen
Uerleent hy ons hier van onser ieucht,
Laet v Liefd' dwinghen,
Eert hem, ghy sult verweruen Ureucht:
Soo veel als ghy oock wenschen meucht.
Ick heb beuonden
Tot deser stonden,
Dat de Heer sijn Ghesalfde bewaert in Deucht.
Hy hoort zeer fijn
Wt den Throon, daer sijn Heerlijckheyt inwoont:
Op dit termijn,
Siet elck sijn Cracht op Eerden:
Sommighe zijn,
Die meynen hier te zijn ghecroont,
Deur Moeyt en Pijn,
Uan Waghens oft van Peerden,
Sulcx t'aenveerden,
En mach altijt niet baten:
| |
[Folio 106r]
| |
Maer die volheerden,
En haer op Godt verlaten,
Sullen doen bouen maten
Menich groot Werck,
Crachtich en sterck,
Weerdich te vertellen allen Staten.
| |
§ Prince.Heur Cracht is groot,
Maer Prins sy worden al daeraf berooft:
Deur stercken stoot
Uallense lichtelijck beneden,
Wt swaerder noot
Helpt Godt die vast in hem ghelooft:
T'bleeck aen ons bloot,
Wy staen, en sy zijn vertreden.
Godt des Ureden
Sal den Coninck zijn behoedich,
En ons Ghebeden
Nemen van ons ootmoedich:
Deur sijn Goetheyt ouervloedich,
Roepen wy aen hem,
Hy hoort ons Stem,
En hy sal ons zijn voorspoedich.
|
|