Refereynen ende liedekens

[fol. 100v]

§ Refereyn. 44.

Audenaerde.
Pax vobis.
Cornelis van Asselt.

LIeue Broeders in Christo den Heere,
De Godsalighe Weluaert eens Lantschaps bekent,
Is van bouen neder dalende zeere,
Ghelijck alle gauen doen, nae Petrus Leere,
Ons vloeyende wten Woorde Gods excellent,
Dus dienter warachtighe Wijsheyt ontrent,
Daer de Landen recht souden zijn ghegouuerneert:
Want deur Gods Wijsheyt was tswęrelts fundament,
Uoorsienich gheschepen, en goet gheapprobeert,
Dus wat Regiment dat Wijsheyt obserueert,
T'dient de Landen gherust in alder manieren,
Maer daer Wijsheyt inde Landen cesseert,
Nakende Plaghen midts groote dangieren:
Dus wat Landen hem met wijsen Raet vercieren,
Nae sulck een Ouerheyt soo t'Ghemeente dusten.
Daer de Princen dan alsulcx hantieren,
Een wijs Godlijck Recht houdt de Landen in rusten.

Een Ouerheyt des Lands is in hem seluen vry,

D'lant, gelijck elcx menschen lichaem heeft een maghe,
En is die Maghe niet suyuer, hoe dat zy,
De Mensche en is niet ghesont, cause waer by,
T'es de Ruste sijns leuens t'elcken daghe,
Sghelijckx een Ouerheyt die t'haers selfs behaghe,
Tvolck regieren om haerlier ghewinnen,
Daer en is gheen Ruste, de Liefde werdt traghe,

[fol. 101r]

 

Om dat sy tghemeen proffijt niet en beminnen,

 

Die oock gheen meester en is van sijns selfs sinnen,

 

Hoe sal hy een goet Regierder s'Landts wesen?

 

Mijn oordeel is van buyten niet, maer van binnen,

 

Alleene tot tsmenschen salicheyt ghepresen,

 

Soeckt wijse discrete mannen naer desen,

 

Die d'Landt regieren, en goet van inbusten,

 

Daer wijsen Raet in een Landt is gheresen,

 

Een wijs Godlijck Recht houdt de Landen in rusten.

 

 

 

Een wijse Ouerheyt werckt Liefde reene,

 

T'es s'Landts behoudinghe en svolcx verstercken,

 

Want alle Regimenten groot ofte cleene,

 

Nemen hier wt haren oorspronck alleene,

 

Soomen in alle quaertieren mach mercken,

 

Wijsheyt werckt deucht, het sticht sonder versnerken,

 

En elck is int sijne broederlijck te vreden,

 

Wel gheluckich, vriendelick, vol goeder wercken,

 

Tverdrijft quade Costumen deur goede Seden,

 

T'Is den bandt der Liefden met gherechticheden,

 

T'Uolcommen des Wets, nae Paulus verclaren,

 

Hoe salich is t'Hooft, dan met al sijn Leden,

 

Daer sulck een Ouerheyt can openbaren,

 

Recht voor Recht sonder yemants beswaren,

 

Ghewichte nae maete, tmach elcken lusten,

 

Om dat deur sulcx compt een eendrachtich vergaren,

 

Een wijs Godlijck Recht houdt de Landen in rusten.

§ Prince.

Alle Ouerheyt is van Godt den Uadere,

Gheestelijck, Węerlijck ons deur Christum gegheuen,

[fol. 101v]

 

Niet tot misbruyck, maer Christus de Adere,

 

Tswęrelts Iudge, nochtans ons Ontladere,

 

In wien t'rechtveerdich Oordeel staet beschreuen,

 

Om dat gheen volck sonder Ouerheyt can leuen,

 

Deur tsmenschen boosen aert der Natueren,

 

Soo is t'Sweerdt van Iusticien achterbleuen,

 

Tot straffe des quaden en t'elcker hueren,

 

Dat de Goede met Ureden souden ghedueren,

 

Op dat sy al in Godts Woordt mochten beclijuen:

 

Ghy Ouders en wilt v lien niet verstueren,

 

Onderwijst v Kinders sonder twist oft kijuen,

 

Op datter voorsienighe slandts meughen blijuen:

 

Want wie oyt Discoort en Tweeracht blusten,

 

Om dat sy deur Wijsheyt Onruste verdrijuen.

 

Een wijs Godlijck Recht houdt de Landen in rusten.

§ Liedeken op de wijse,
Ghy ouden Grijsaert al sliepty totten noene.

WOnderlijck Godt van Israel,
Die Dauids gheest hadde vercoren,
Dat hy al met der Herpen spel,
Conste verdrijuen Sauls thoren,
Als Dauid moet elck zijn herboren,
Wt dat Water ende den Gheest:
Abrahams Eed, deur Beloften ghesworen,
Gheuen Gods Rijcke onbeureest. Abrahams. etc.

T'Was te voren ghepropheteert,

Datter een Spruyte sou oprijsen
Wt den Stamme veriubileert,
Uan Isay niet om volprijsen
Die tsmenschen Salicheyt sou wijsen,

[fol. 102r]

 

Deur t'Spel van deser Harpe soet,

 

Dat is Godts Woordt al t'onser Sielen spijsen,

 

En weeren soo tsvyants ghebroet.

 

 

 

Saul te dijer tijt was onstelt

 

Als den boosen Gheest was ghecommen,

 

Tsghelijcx waren wy oock ghevelt

 

Deur Adams Ual in tswaer verdommen:

 

Maer als de Sonne was gheclommen,

 

Uerghinck d'Oude Wet tsvyants gheclach,

 

Deur Iesum Christum mach hem elck berommen,

 

Sijn Woordt gheeft ons den claren Dach.

 

 

 

Soo Sauls gheest voor Dauids weëck,

 

Tsghelijckx moeten wy oock verdrijuen

 

Al tsvyants boosheyt Clerck of Leeck,

 

Op dat elck mach stantvastich blijuen:

 

Dees Harpe is niet om volschrijuen,

 

Haer Gheluyt roept verre en naer,

 

Zijt doch gheloouich alle Mans en Wijuen,

 

Dat gheeft v d'onderscheedt voorwaer.

 

 

 

T'Uerstant van deser Harpen bloot,

 

Is in Ootmoedicheyt beseuen:

 

Want de Letter (soot blijckt) slaet doot,

 

Maer deur den Gheest compt Cracht en Leuen:

 

Dees Musijcke die werdt ghegheuen

 

Deur Godts Gheest in ons herten gront,

 

Soo kennen wy onsen uader verheuen,

 

Hier deur werdt ons Siele ghesont.

 

 

 

Dauids Spel leert ons figuerlick,

 

Christum kennen vol alder Eeren,

[fol. 102v]

 

Den Tweeden Dauid schriftuerlick,

 

Die wt bluste tsvyants verseeren,

 

Ghelijck hem Dauid wilde keeren

 

Tot Goliam die hy const verslaen,

 

Insghelijckx soo heeft de Heer der Heeren

 

T'Hooft des Serpents te niet ghedaen.

 

 

 

Nu is den tijt op ons verlieft,

 

Wy hebben Gratie vercreghen,

 

Twas al beschadicht en ghegrieft,

 

Wy waren al ter Doot versleghen,

 

Nu zijn wy verlost en bedeghen,

 

Laet ons verblijden met spel en sanck,

 

Is Godt voor ons wie cander dan oock tseghen,

 

Wy zijn nu wt ts'Uyants bedwanck.

§ Prince.

Schept nu dan eenen nieuwen lust,

Prince der Corenbloemkens reyne,
T'Herte dat is nu al gherust,
Deur tvoetsel van dees schoon Fonteyne,
Die Snaerkens zijn voor ons ghemeyne.
Christus in de Cruyce ghestreckt,
Looft Godt soo Dauid dede groot en cleyne,
Christus es van der Doot verweckt.