Refereynen ende liedekens
(1563)–Anoniem Refereynen ende liedekens–
AuteursrechtvrijBloeyende Wijngaert rancke tot Berchem.
| |
[Folio 95v]
| |
D'eendrachtighe Ghemeynte is weert om prijsen,
Met goeyen raet versamende als de Wijsen,
Can in Rusten houden alle Landen oft Stat
Bouen eenighen Schat //
Men sieter niet dan Urede en Liefde wt rijsen,
Ende die Ouders eeren, want Christus dat
Bewijst v zeer plat //
Uolght hem na, bidt hem opt sijnen Wijsheyt wat
Daer de Wijsheyt is en can de boosheyt niet wercken
Haet en Nijt vergaet, hun leeringhe is mat,
D'Eendrachticheyt verdrijftse wt alle percken,
D'Landt blijft in Rusten Godt wiltse verstercken,
En wiltse als Schaepkens by een vergaren,
Dus Broeders, wilt na de Gherechticheyt hercken,
T'is v Salicheyt, laet Nijdicheyt varen,
Ondersoeckt de Schriftuere, t'hert sal openbaren
Met Lofsanck tsamen in tijen van Weene,
D'eendrachtighe Ghemeynte wt Liefden reene.
Weest eendrachtelijck ghesint, deur Wijsheyt sticht
Broeders uwen Naesten, volcht Christum int d'licht,
Elck neem sijn Cruyce al ist swaer om draghen,
Latet v behaghen //
Ghy crijcht d'eewighe Urede, dus v boosheyt swicht,
Oft ghy sult noch crijghen meerder plaghen
Inde leste Daghen //
Alsmen v daer elck bysonder sal vraghen
Na v goede wercken, en ghy en hebt gheen ghedaen,
Dan ist te spade, en wilt niet vertraghen,
Oft ghy sult wt d'Leuen in de Duysternisse gaen,
Daer suldy hooren Knersselinghe der tanden saen,
| |
[Folio 96r]
| |
Dus hebt Liefde en Eendrachticheyt vercoren,
Op dat ghy in v Landen blijft vast staen,
Noch gheen van v Schaepkens en gaen verloren,
Ghy blijft in Urede, t'drijft te niet tsvyants thoren,
Gheenen hoop soo groot can verwinnen alleene
D'eendrachtighe Ghemeynte wt Liefden reene.
| |
§ Prince.D'eendrachticheyt can in Rusten houwen
De Landen, niemant en derf niet grouwen
Uoor twist, discort, roofte, want sy zijn eens ghesint,
Elck d'een d'ander bemint //
Huns Naesten ongeluck sou hen thert deurknouwen,
Deur Liefde zijn sy op malckanderen verblint,
Simpel als een Kint //
In Wijsheden blijuense vast gheprint,
Godt leydtse na t'Hemels Ierusalem schoon,
D'lant blijft in Rusten men niemant tweedrachtich vint
O Broeders laet ons soo leuen elck persoon,
Op dat wy d'eewich Leuen crijghen te loon,
Daer wy als Pelgrims om niet zijn ghesonden,
Willet tvleesch achten minder dan een boon,
D'leert v alle Boosheyt zeer quaet om gronden,
Doedy wel soo zijdy van v misdaet ontbonden,
En d'Lant blijft in ureden sulcx trecket te beene,
D'eendrachtighe Ghemeynte wt Liefden reene.
| |
§ Liedeken op de wijse,
| |
[Folio 96v]
| |
Wilt uwen Uyant niet schromen,
Hy heeft eenpaer
Uoldaen voorwaer,
U smetten wt ghewreuen // als
Wilt allegaer
Hem volghen naer,
Sijn Rijcke claer
Hy ons dan gheuen // sal.
Sijnen Naem die is zeer hooch ghestelt,
Bouen alle dinck op Eerden,
Hy heefter inne sijn ghewelt,
Hy is Godt van grooter weerden,
Sijn Huysen goet
Die zijn zeer soet,
Wel hem die daer in Rusten // mach
Ureucht maken moet,
Met snelder spoet,
Als Dauid vroet
Alst hem te lusten // plach.
Wy hebben met ons ooren ghehoort,
Ons Uaders niet en versweghen
U wonder Wercken rechtevoort,
Die sy dick hebben vercreghen,
Al met v Hant,
Al wt hun Lant
Die Heydenen wt gheroeyt // snel,
En in gheplant
Ons Uaders want
Deet ghy bijstant,
Dus ons Liefde bloeyt // snel.
| |
[Folio 97r]
| |
Daghelijcx aenmercken wy noch meer,
U Ghetrouwicheyt idoone,
Onsen mont moest vertellen zeer,
Altijt deur Lofsanghen schoone,
Deur goeden Raet,
Uwer Weldaet,
En costen wy volprijsen // noyt,
Tot alle quaet,
Ons herte staet,
O Heer ons saet,
Uan sulcx afgrijsen // doyt.
Ghy hebt een compackt met hen ghemaeckt,
Die ghy zeer hebt wtvercoren,
Hen Nacomelinghen onghelaeckt,
Wilt ghy niet laten verloren,
Maer blijuen by,
Wie dat hy zy,
Die wt Liefden beminnen // ou,
Dus moeten wy,
U louen vry,
Op dat elck bly,
Uan v verwinnen // sou.
Looft den Heere ghy die int hoochste woont,
Loeft hem ghy Enghelen bouen,
Sterren, Sonne, en Mane, hem verschoont,
Laet den Heere alle louen,
En wilt hem saen,
Nu louen gaen,
Al die van hem gheschapen // zijt,
Doet sijn vermaen,
| |
[Folio 97v]
| |
Hy heeft ontlaen,
Wilt op sijn Baen
Ghenuechte rapen // wijt.
Hy heeft beuolen wt Liefden ras,
Sijn Enghelen v te draghen
Sonder sorghe deurt tslangen ghebras,
Oyt bevrijt deurt tsvyants plaghen,
En sullen sien, Noch bouen dien
Sijn Heerlickheyt verheuen // groot,
Want tsal gheschien,
Den Nacht moet vlien,
Wilt d'Licht bespien,
Hy salt v gheuen // bloot.
Princen en Coninghen dit ist slot,
Loeft hem ghy Rechters beneden,
Ons macht is al, Niet sonder Got,
Bout sijnen Wijngaert in Ureden,
Al in v Ieucht
Sticht daer in Ureucht.
Broeders, want tsijn Beuelen // is,
Tot Liefde peucht
U, waer ghy meucht,
En looft sijn Deucht,
Altijt niet spelen // fris.
|
|