Refereynen ende liedekens

[fol. 75v]

§ Refereyn 34.

Audenaerde.
Soo God wild. Ualcke.

HOe cunnen de schaepkens qualick gheuaren?
Alse de Herders sorchfuldich bewaren
Om gheen saken el, dan wt Liefden perfeckt,
Die de Sonde deckt.
T'sghelijcx wat can een Ghemeente beswaren?
Als d'Ouerhooft coreckt
Niet en is bevleckt
Met Eerghiericheyt, oft Eyghen bate:
Maer wt Liefden sijn Ondersaten is subieckt,
En alle Dolicyen bringhend' op mate.
Die t'Recht wel doet onderhouwen, vroech of late,
Doet Charitate:
Want sulck een Landt in Gherustheyt prospereert
Deur Liefde, die ghestelt werdt in State,
Daer sulck een Liefhebber, als Coninck d'lant regeert
Godt almachtich onder henlien regneert,
En Godt is de Liefde, wie can d'Landt benouwen?
Dus dinckt my simpelick hoement solueert,
Perfecte Liefde can d'Landt in Rusten houwen.

Perfecte Liefden houdt de Landen in Ureden,

Want als t'Hooft doelt, dolen al de Leden:
Wanneer dan de Liefde van een Ouerhooft
T'eenemael is berooft,
Isser vol Onrusten in Dorpen en Steden,
D'een d'ander verdooft,
En diuerschelijck ghelooft,
Dat d'een vrient, d'ander vrient hierom toocht partije,

[fol. 76r]

 

Dit comt dat t'Hooft de Liefde vanden halse slooft,

 

Oft meest doet, nae rigoureuse fantasije:

 

Maer t'Recht doende, wt Liefden t'allen tije,

 

Maeckt Gherusticheyt blije:

 

Want een Coninck die sijn Landt is beminnende,

 

Soeckt alle middelen deur Theologije,

 

Waer deur hy de welvaert mocht zijn ghewinnende.

 

Dus is den Oorspronck deur Liefden beghinnende,

 

Want een Coninck houdt Ruste in sijn Landouwen

 

Oft Onruste, dies ben ick versinnende,

 

Perfecte Liefde can d'Landt in Rusten houwen.

 

 

 

Perfecte Liefde dient elck Hooft principael

 

Ghelijck Moyses hadde op sijn Uolck generael,

 

Op dat sijn Uolck in Gherustheyt mocht leuen

 

Sonder anckst oft beuen:

 

Oft als Dauid sijn volck Liefde droech loyael

 

Uoor Godt verheuen

 

In t'Herte gheschreuen.

 

Moyses wenste voor sijn Uolck tzijne veracht:

 

Dauid voor Israel wilde d'lichaem gheuen,

 

Soo langhe als Salomon wijs zijnde bedacht,

 

Deur Liefden tvolck tracteerde, weerstont met macht

 

Al den Tweedracht,

 

En dat hy van Godt ghecreech Wijsheyt elegant

 

(Die Godt wonderlick bouen maten in hem wracht)

 

Dede ouervloeyende Liefde abundant,

 

Die hy tot sijn Ondersaten doen droech constant:

 

Waer deur gherustheyt quam onder mans en vrouwen,

 

Hier om seg ick, nae tbeuint der Schriften playsant,

 

Perfecte Liefde can d'Landt in Rusten houwen.

[fol. 76v]

§ Prince.

Die in de wercken der Liefden is diligent,

Is voor God almachtich, een Christen iedt bekent,
Gheluckich is d'Lant, oft stadt daer menichvuldich
Is Liefde verduldich,
Wat baet de Gheboden Gods t'zijne obedient?
Sijdy niet ghehuldich,
D'welck ghy zijt schuldich:
Wat baet de Wijsheyt, of t'Ghelooue minioot?
Hebdy gheen Liefde, voor God dryevuldich,
Want alle Deucht, sonder de Liefde is doot,
Dus betoocht elck anderen Liefde groot,
In al v exploot:
Want door Liefde, verwindy alle saken,
Doet v dijn vyant Onruste, oft swaer aenstoot,
Ghy cunt hem deur Liefde v beste vriendt maken,
Hoe naerder s'Węrelts eynde, hoe ons meer naken
Ueel Onrusten, om dat Liefde sal vercouwen,
Dus om te comene ter rechter spraken,
Perfecte Liefde can d'Landt in Rusten houwen.

§ Liedeken op de wijse,
Israel wilt v verblijen. &c.

GOdt hadde naer sijn Herte vonden,
Uol goede gronden,
Dauiden zeer verheuen,
Den Gheest Godts weeck ten seluen stonden,
Al om de Sonden,
Uan Saulen al sijn leuen,
Alsoo werdt hy van hem ghedreuen,

[fol. 77r]

 

Wie dat rebelleert teghen Godt minioot,

 

Als is hem voorspoet, hier ghegheuen

 

Naer t'Soete comt ghęren t'Suere groot.

 

 

 

Dauid op Christus is een Figure

 

Naer der Schrifture,

 

Soo Dauid wt Saul ioech,

 

Den boosen gheest, door t'spelens cure,

 

Als bleef hy sture,

 

Dauid nochtans hem Liefden droech,

 

Ts'ghelijcx dede Christus oock ghenoech, ⁺

 

Duyuel, en Helle leydt hy onder voet,

 

Doot, Sonde, hy met t'Cruyce versloech,

 

Soo Dauid verdreef Sauls boose Woet.

 

 

 

Wat baette Sauls benijdinghe?

 

Oft sijn strijdinghe,

 

Teghen Dauidem eenpaer,

 

Als Dauid sonder vermijdinghe,

 

Met verblijdinghe,

 

Hem groote Liefde droech, voorwaer,

 

En t'quaet met t'goet, loonde openbaer, ⁺

 

Gheen wrake heeft hy voor hem ghetoont,

 

Mits dat hy wist de Schrifture claer,

 

Gheeft my de Wrake, sy werdt gheloont.

 

 

 

Saul en wildes niet ghedooghen,

 

Dat voor sijn ooghen,

 

Dauid soude staen present,

 

Daer hy hem sach veel Ionsten tooghen,

 

Onder hem booghen,

 

Dwelck al den Heere was bekent,

 

Daer hy altoos was diligent, ⁺

+ ii.

+ ii.

+ ii.

[fol. 77v]

 

Om te beschudden t'volck van Israel,

 

Nochtans daer niemant soo excellent

 

Die Saul const vermaken deur tspel.

 

 

 

Te voren hadhy hem versleghen,

 

Daer niemant teghen

 

En dorst te Strijde gaen:

 

Wie heeft sulcke Uictory creghen?

 

T'dient niet ghesweghen,

 

Deur Liefde heeft hijt al ontfaen,

 

D'Orloochs cracht en mocht hem niet schaen, ⁺

 

Noch t'Philistijnsche Heir, groot int ghetal,

 

Noch voor Beir oft Leeuw was hy belaen,

 

Die in Liefden blijft, verwinnet al.

 

 

 

Elck volghe dan Dauids manieren,

 

Reyn int vercieren,

 

Wildy van God zijn bemint,

 

Wilt uwen vyant obedieren,

 

In v hantieren,

 

En ghy alsoo sijn Siele wint,

 

U Ureucht en Blijschap van v beghint, ⁺

 

Dat Liefde soo, tot uwen broeder streckt,

 

God is v Uader, en ghy sijn Kint,

 

Want Liefde menighe Sonde deckt.

 

 

 

Al waerdy oock in alle Stede,

 

Niewers met Ureden,

 

Dinckt t'moeste Dauid gheschien,

 

Danckt den Heere in v Ghebeden,

 

Peynst, t'zijn de Seden,

 

Dauid moeste selue wel vlien,

 

Maer en wilt niemant quaet voor quaet bien, ⁺

+ ii.

+ ii.

+ ii.

[fol. 78r]

 

Was Christus vervolghet, op dat termijn,

 

Men sal vande Cnapen t'selue sien,

 

Soudense beter dan den Meester zijn?

§ Prince.

Prince wilt wel considereren,

D'moralizeren,
Dat God noyt ghedaen heeft iet,
Tot ons Salicheyts prospereren,
Sonder caueren,
Ten is deur Liefden al gheschiet,
Aldus moet zijn of ten helpt ons niet, ⁺
Comen dan alle de gauen van Godt?
Deur Liefden soomen perfeckt wel siet,
Soo moet oock wt ons, t'is Gods Ghebodt.

+ ii.