Refereynen ende liedekens

§ Refereyn 32.

Audenaerde.
Pax vobis.
Ick mercke de Ionste.

DIe tseuentich Ouders, soo daer staet geschreuen
De welcke regeerden Israel verheuen,
Binnen Moyses tijden,
Heeft Godt den Gheest des Wijsheyts ghegheuen,
Op dat sy rechtveerdich souden zijn beseuen,
En sijn Woordt belijden,
Niet wijcken ter eender noch ter ander sijden,
Maer wandelen in de Ureese des Heeren,
Ende een Licht wesen, tot elcx verblijden,

[fol. 71r]

 

Waer wt dat alle Ouerhoofden sullen leeren,

 

Dat sy moeten beghaeft zijn tot sdeuchts vermeeren

 

Metten seluen Gheest,

 

Willen sy heur Lant houden sonder verzeeren,

 

En twistich Tempeest:

 

Want dit is den keest,

 

Waer by minst en meest,

 

In ts'Weerelts foreest,

 

Meughen in Rusten leuen, tzij Mans of vrouwen,

 

Dus ouer een beghin segg'ick puer onbevreest,

 

Godtsalighe Wijsheyt can alle Landouwen,

 

In Rusten houwen.

 

 

 

Dan varen de Landen wel, t'allen stonden,

 

Als de Ouerhoofden wijs zijn beuonden,

 

En de Waerheyt minnen,

 

Want sulcke sullen altijts Gods lof vermonden,

 

En zeer cleene zijn in heur selfs gronden,

 

Tot s'deuchts ghewinnen,

 

Niet hem seluen soecken tzij buyten oft binnen,

 

Maer t'gemeyn profijt altijts practijckieren,

 

Niet wreet zijn, maer wijsselijck altijts versinnen,

 

De Goede beschermen, de Quade punieren,

 

Gheen onrechtveerdighe Wetten versieren,

 

Wt verwaenthede,

 

Alle Idolatrie wt royieren,

 

D'welck Iosias dede

 

Setten t'alle stede,

 

Wijse Leeraers mede,

 

Uan reynder zede,

 

Op wiens leeringhe elck hem wel mach betrouwen,

[fol. 71v]

 

Daer dit regneert, Ruste isser en Urede,

 

Godtsalighe Wijsheyt can alle Landouwen

 

In Rusten houwen.

 

 

 

Alle die van God zijn gheset in t'Regiment,

 

Moeten hebben d'Licht des Wijsheyts excellent,

 

Om te schouwen Tweedracht,

 

Wel dat Lant daer warachtich wijs is een Regent,

 

Want Wijsheyt (Godsalich veur God bekent)

 

Is beter dan Cracht,

 

Dit heeft Salomon rijpelijck ouerdacht,

 

Doen hy Coninck in Israel was ghestelt,

 

Hy badt om Wijsheyt vierichlijck dach en nacht,

 

Om d'Lant in Rusten te houden en onghequelt,

 

Hy en socht gheen langhe daghen, Goedt, noch Gelt,

 

Dan Wijsheyt alleene:

 

Want gelijck t'hooft is, soomen ons voorwaer vertelt

 

Sulck is t'Uolck ghemeene,

 

Hier by groot en cleene,

 

Zijn vrij van weene,

 

Uan Twiste reene,

 

Liefde deur de Wijsheyt, slaeckt al tswaer benouwen,

 

Ende beweecht t'Herte al waert van steene,

 

Godsalighe Wijsheyt can alle Landouwen

 

In Rusten houwen.

§ Prince.

Wee der Eerden, daer den Coninck vanden Lande

Een Kint is, puer onwijs van Uerstande,
Oproer siet men rijsen,
De Princen soecken hen seluen, dwelck is schande,
Sluytende d'Onnoosel binnen sdroefheyts bande,

[fol. 72r]

 

En deerlijck verpijsen.

 

Aen Roboam machmen dit wel bewijsen,

 

Met meer ander die deur Onwetenheyt groot,

 

Brochten hem seluen, en t'volck in sdoots afgrijsen,

 

En soo haest als oock desen Gheest van Saul vloot,

 

Hy, ende sijn Leden quamen in grooter noot,

 

En leden veel Plaghen:

 

Daerom creech Pharao, inde Wijsheyt al bloot,

 

Sulck een groot behaghen,

 

Dat hy sonder traghen,

 

Dede surghe draghen

 

(Niet sijn naeste Maghen)

 

Maer maeckte Ioseph Prince in elcx aenschouwen:

 

Dus moet ick veur een Solutie ghewaghen,

 

Godsalighe Wijsheyt can alle Landouwen

 

In Rusten houwen.

§ Liedeken op de wijse,
Rijck Godt hoe moet ick. &c.

TOT v soo zijn mijn spraken,
Wilt die wt Liefden smaken,
Ghy Ouerhoofden der Eerden,
Dijn Furien doet slaken,
Urede wilt tsamen maken,
En Iock des Heeren aenveerden,
Uolght niet Muylen en Peerden
Onredelijck versteent,
De Wijsheyt houdt in weerden,
Maer dunckt dat v God al verleent.
De Wijsheyt. etc.

[fol. 72v]

 

Een Coninck wijs beuonden,

 

Soo wy hooren vermonden

 

Sijn Aenschijn blinckt als den gouwe,

 

En alle boose gronden,

 

Met heur verufte sonden,

 

Uerstroyts hy wt sijn Landouwe,

 

Enbringt daer ouer nouwe,

 

Den ghewelfden hoghe reyn,

 

Sijn volck is hy ghetrouwe,

 

En houdtse in Rusten certeyn.

 

 

 

Salich moet dat Landt wesen,

 

Daer den Coninck ghepresen,

 

Edel is in al sijn seden,

 

Niet en comter gheresen

 

Onder t'volck, zoo wy lesen,

 

Dan bernende Lieflijckheden,

 

Aen Iosaphat vol Ureden,

 

Machmen claerlijck nemen ghoom,

 

Ghelijck t'Hooft zijn de Leden,

 

Aen de Uruchten kentmen den boom.

 

 

 

Deur des Wijsheyts practijcken,

 

Soo sietmen alle Rijcken,

 

Ureedsamelijck accorderen,

 

By haer het sal zoo blijcken,

 

En machmen yet ghelijcken,

 

Dat ter Weerelt mach regneren,

 

Sy doet Pays triumpheren,

 

De Goey leyde wt t'verdriet,

 

Haer Uruchten t'gout passeren,

 

Sonder Gods Goedheyt eest al niet.

[fol. 73r]

 

Wilt v lien ter Deucht keeren,

 

Gods Woordt altijts vermeeren,

 

Ureest hem hoe hooghe gheseten,

 

Want de Ureese des Heeren,

 

Is d'beghin wilt dit leeren,

 

Uander Wijsheyt onghemeten,

 

En wilt hem niet vergheten,

 

Sijn goetheyt altijts t'uwaerts waeckt

 

Op v is hy vervleten,

 

Die God versmaet, schande hem naeckt.

 

 

 

Waerheyt ende Ghenade,

 

Bewaren vroech en spade,

 

Alle Coninghen verheuen,

 

Die waerachtich by Rade,

 

Uan de Erme slaen gade,

 

Het zijn Godts Dienaers beseuen,

 

Sy sullen eewich leuen,

 

En Loon naer het werck ontfaen,

 

Ia heuren Throon becleuen,

 

Sal eewelijck ghevesticht staen.

 

 

 

Hieroboams versieren,

 

En meuchdy niet hantieren,

 

Oft v Rijcke dat sal scheyden:

 

Ozias quaey manieren,

 

Wilt wt der herten stieren,

 

En laet v geenssins verleyden,

 

Wilt wel v Schapen weyden,

 

Zijt als Moyses wijs ghesint,

 

Want naer het t'Schrifts verbreyden,

 

Wijsheyt alle Quaetheyt verwint.

[fol. 73v]

§ Prince.

Ghy edel Prince ieuchdich,

Stiert v ter Wijsheyt deuchdich,
Soo meuchdy hier naer verblijden,
Bidt met der herten vreuchdich,
Dat ghy hier crijcht verheuchdich,
Desen gheest tot dijns bevrijden,
Gods Goetheyt t'allen tijden,
Staet open, hier hebdy t'slodt,
Wilt lieflijck altijts strijden,
Want waer Wijsheyt is daer is Godt.