Refereynen ende liedekens
(1563)–Anoniem Refereynen ende liedekens–
AuteursrechtvrijAntwerpen. Goubloeme.
| |
[Folio 64v]
| |
Wijsheyt, een wortel van alle Deuchden gheacht,
Wat, en can die ouer al niet wercken?
T'is een Gaue, daer de Goddelijcke Cracht
Den Menschen gheiont, tzij Leecke, of Clercken,
Hier om, alsmen wilt alle saken aenmercken,
Niet Goets en can sonder wijsen Raet gheschien,
Wijsheyt moet alle dinghen tot Deuchden stercken,
Wijsheyt gaet voor Cracht, so Salomon can bedien,
Souwen dan niet deur des Wijsheyts raets ghebien
Alle Landen worden in Rusten ghehouwen?
Alle Tweedracht moet voor wijsen Raet vlien,
En wijsen Raet sal alle Onruste schouwen:
Hierom met wijsen Raet moet hy bouwen
Die met Onrusten wort ghepersequeert,
En daerom can (tzij deur mans of vrouwen)
Landen in Rusten houwen (dit incorporeert)
Wijsen Raet, Godlijck, en rechtelijck ghevseert.
Alle Gheestelijcke Regenten en Heeren,
Met eenen wijsen Godlijcken Raet goet,
Schuldich zijn te houdene in Eeren
Een Religie, en een Ghelooue moet
Regneren ouer al deur alsulck middel vroet,
Om dat de Landen souden in Rusten blijuen,
Want Rust en Ure, leght deerlijck onder de voet,
Alsmen Tweedrachticheyt siet verstijuen
Deur t'Ghelooue, en sulck quaet can verdrijuen
Wijsen Raet, Godlijck, en rechtelijck befaemt,
Wijsen Raet, en sal twisten noch kijuen,
Daerom seydt Plutarchus een Philosooph vernaemt
Ghelijck een in Musijcken ongheleert, hem schaemt
| |
[Folio 65r]
| |
En niet weerdt en is dat hy t'Snaerspel hanteert,
Soo oock, t'regiment der dwasen, niet en betaemt,
Want oyt heeft Rust en Ure gheproponeert,
Wijsen Raet, Godlijck en rechtelijck gheuseert,
| |
§ Prince.Al dat Wijslijck, Godlijck, en met Rechte
Gheploghen wort, dat moet Deucht inbringhen,
Waer deur men de godloose, en de slechte
Can beweghen, en tot Rust en Ure dwinghen,
En s'Menschen Salicheyt, bouen alle dinghen
Moet spruyten, deur wijsen Raet voorsproken,
Waer deur een Ghelooue sonderlinghen
Sal d'ouerhandt hebben sonder eenich eroken,
Want gheensins en macht worden ghebroken
Tghene dat Wijslijck, en Godlijck ghebeurt,
Ende rechtelijck daert oock al in is beloken,
Daer om een Lant dwelck nae wijsen Raet speurt,
Die godlijck en rechtelijck is, onghetreurt,
Sal in Rusten blijuen, en onghefaelgeert,
Altoos propereren, hier om heeft ommeurt,
Segghe ick Prince, Ruste, en concludeert,
Wijsen Raet, Godlijck, en rechtelijck gheuseert,
| |
§ Liedeken op de wijse,
| |
[Folio 65v]
| |
Mijn Misdaden, ende mijn Sonden,
Mijn Hooft te bouen gaen t'alle stonden,
Ende ghelijck eenen swaren last,
Hebben mijn Boosheden my belast.
Alle mijn begheerten, O Heere,
Ende dan mijn versuchten wel zeere
En is noch heden, is noch morghen,
Uoor dijn Godheyt niet verborghen.
Mijn Urienden en oock mijn Naesten,
Met quaet altoos teghen my willen haesten,
En die eertijts by my zijn ghebleuen,
Die zijn nu verre van my verdreuen.
Ghewelt en Fortse hebben sy ghedaen,
Die mijn Siele bederuen wouwen saen,
En niet dan ydelheyt sy en spraken,
Die met alle Quaet my wouwen vermaken.
Maer als de Dooue, heb ick niet ghehoort,
En ghelijck de Stomme sonder rappoort
Was ick altoos, en t'elcker spatie,
Zijnde oock sonder Arguatie.
Maer op v, O Heere, is mijn betrouwen,
Niet achtende haer die op my spouwen,
Sy sullen int eynde noch werden beschaemt,
Al zijnse nu zeere sterck vernaemt.
O Princelijck Godt, ouer alle Staten
Hebdy de macht, wilt my niet verlaten,
Maer compt my te baten, en helpt my wt Weene,
Want ghy zijt mijn Behulper alleene.
|
|