Refereynen ende liedekens
(1563)–Anoniem Refereynen ende liedekens–
AuteursrechtvrijTshertoghenbossche.
| |
[Folio 48r]
| |
De gheschicktheyt des Eertrijckx, wel connen weten,
Waer deur ghy Ruste, sult brenghen in d'Lant
Die de Liefde baert, door Gods cracht onghemeten,
Dus solueer ickt Broeders hier nu gheseten,
Dat de Landen meest houdt in Rusten ghemeene,
Wijsheyt, die deur Godts Gheest, regeert alleene.
Moyses beual de Wet in Gherechtichede
De Erffenisse den Huyse Iacobs mede,
En de Beloften zijn Israel gheschiet:
Hy heeft Dauid sijnen knecht gheset in Urede,
D'alder sterckste Coninck, die na s'Wijsheyts Sede
Israel regeerde in Godts Gheboden, siet,
Ghy die de Landen dan regeert, vaer dit bediet,
En draeght haerder sorghe deur Wijsheyt ghepresen,
Wilt v seluen gheensins verheffen niet:
Maer als een wt haer, wilt onder hen wesen.
In als onderhoudt Godts Gheboden in desen,
Soo en sal de Liefd' onder v niet vercouwen,
Want daer staet gheschreuen alsoo wy lesen,
Dat de Liefde alle Tweedracht doet schouwen,
Dies ic my noch aen mijn eerst propoost moet houwen
Dat meest d'Lant in Rusten hout, en helpt wt weene
Wijsheyt, die deur Godts Gheest, regeert alleene.
Een wijs Rechter sal sijn volck deur Godts gheest saen
Oordelen, dies sijn Heerschappije blijft staen,
Want Godt is sijn verstant met Wijsheyt voeyende.
Nae dat de Rechter des volcx is, hoort dit vermaen,
Insgheljicx zijn oock sijn dienaers ghedaen,
Soo een yeghelijck wel is bevroeyende,
| |
[Folio 48v]
| |
Ghelijck een Regeerder der Stadt is groeyende,
Soo werden d'Inwoonders oock altijt beuonden,
Een onwijs Coninck sal hem zijn spoeyende
Sijn Landen te bederuen tot allen stonden:
Maer daer de wijsheyt met Gods Geest is verbonden,
Daer siet men d'Landt in Rusten triumpheeren,
Den Uoorspoet werdt haer van Godt ghesonden,
Om datsy alleen sijn Ghenade eeren,
Niemant en kennen sy dan den Heer der Heeren,
Dies haer in Rusten houdt haer Landen reene,
Wijsheyt, die deur Godts Gheest, regeert alleene.
| |
§ Prince.Ghy Coninghen en Princen op Eerde gheset,
Regeerders en Rechters doch hier op let,
En bidt den Heere om sijn Ghenade minioot,
Houdt v Conscienci reyn en onbesmet,
Wt reynder puerder herten bewaert Godts Wet,
Op dat hy v mach blijuen sijn Wijsheyt deuoot:
En ghy Ghemeente machtich van volcke groot,
Weest onderdanich v Ouerheyt perfect,
Ghelijck ons beuolen heeft Christus ons Hoot,
Soo totten Romeynen staet gheschreuen correct:
D'een vermae den andren met Gods woort onbevlect,
Den onnutten Tweedracht wilt van v verdrijuen,
Wat tot Ruste des Landts dient tot uwaerts trect,
En wilt altijt in Godts Ureese blijuen:
Hier me wil ick tslot van mijn Soluci schrijuen,
Dat d'lant meest in Rust hout, na mijn verstant cleene,
Wijsheyt, die deur Godts Gheest regeert alleene.
| |
[Folio 49r]
| |
§ Liedeken op de wijse, Ick had een ghestadich Minneken. &c.UErheught nu inden Heere,
Ghy Rechtueerdighe, siet,
Belijdt hem, en gheeft hem eere,
En singt hem een Nieu liet:
Want hy v Salicheyt biet,
Al deur sijn Woordt ghepresen,
Wilt daerom danckbaer wesen,
Uan hem en wijckt doch niet.
Wandelt recht in sijne Weghen,
Soo hy gheboden heeft,
Wilt oock niet zijn versleghen,
Als v sijn Cruys aencleeft,
Want alle die daer leeft
Na sijnen Woorde verheuen,
Werdt benautheyt toe gheschreuen,
Hier om doch niet en sneeft.
Als den appel sijnder ooghen
Bewaert hy de sijn altijt,
Hy gheeft haer macht te ghedooghen
Wat haer gheschiet met vlijt,
Al werden sy benijt,
Uan Cayns gheslacht verwaten,
Hy en salse niet verlaten
Met sijn Ghenade wijt.
Siet doch hoe wonderlijcken
Zijn wercken sijn playsant,
Soo hy heeft laten blijcken
| |
[Folio 49v]
| |
Aen Israel vaillant
Want met een stercke Hant
Heeft hyse doen vertrecken
Wt d'Egiptensche plecken,
Na dat Beloofde Lant.
Sy riepen tot den Heere goet
In haerder meesten noot,
Dies hyse verloste metter spoet
Wt haerder Benautheyt groot,
Hy gaf haer Hemels Broot,
Wten Steen soo de hy leken
Water tot haer ghebreken
Als een goet Godt minioot.
Wilt oock soo nu vergaren,
Al in des Heeren Naem,
Laet v Ghebet altijt varen
Na den Hemel Lofsaem,
Soo sal v de Heer bequaem
Oock, ghelijck Israel, spijsen:
Wilt nu dan verjolijsen,
En maken groot sijn faem.
Laet oock den Psalter clincken
Uan thien Snaren perfect,
Waer mede ghy sult crincken
Sauls gheest incorrect,
Al was sijnen moet bevlect,
Dauid can hem verdrijue
Den Woedt van sijnen lijue,
Als hy sijn Herpe trect.
| |
§ Prince. | |
[Folio 50r]
| |
Edel Prince vercoren
Der Corenbloemen reyn,
Wilt hier deur Ureucht oorboren
Met v Broeders ghemeyn
Hier in dit Eerdtsche pleyn,
Dus soo blijf nu beuolen
Die v niet en laet dolen,
Godt d'opperste Fonteyn.
|
|