Refereynen ende liedekens

[fol. 45v]

§ Refereyn 20.

Wijngaertrancke tot Berchem. Niet sonder Godt.
P. Heyns.
Wel hem die Godt betrout.

GHelijck den Mensche, die in Onrusten // leeft,
(Redene onghehoorsaem en al haer maten)
Hem seluen etende, met Onlusten // sneeft:
Soo ist met een Huysghesin, tzij van wat Staten,
Dat tweedrachtich der Liefden Wet heeft verlaten,
Het moet vergaen, t'en can niet staende blijuen:
Soo ock alle Landen met haer Ondersaten,
Die in Onrusten zijn (waer deur sy God haten)
Bederuen haer seluen, veurspoet sy verdrijuen:
Als Saul in haer selfs sweerdt sy haer ontlijuen:
Want den goeden Gheest des Heeren wijckt van haer.
En als Iudas sy meest wanhopich verstijuen,
Doodende moetwillich haer edel Sielen: maer
Dit hoort elck int sijn (eer onrust opt lant valt swaer)
Te verhoedene, en d'Onuerstandt // schouwen,
Met gewillich aen doen t'iock Christi: want veurwaer
God gehoorsaem zijn, can in Rusten d'landt // houwen.

Ouerheyt en Ghemeynte zijn eendrachtich // moet,

Sou d'Landt in Rusten wesen buyten en binnen.
Nu en can (veur elcken int ghemeen machtich // goet)
Dees Eendrachticheyt niet gheduerich verwinnen,
Ten zij dat elck met gansscher herten en sinnen,
God ghehoorsaem zij, t'slot der Wet en Propheten.
D'welck de Ghemeynte d'Ouerheyt doet beminnen,
Als tkindt den vadere in al sijn beghinnen,

[fol. 46r]

 

En d'Ouerheyt Eyghen liefde vergheten,

 

Om tghemeyn profijts wil: met wijse secreten

 

Uolghende d'opperste Ouerheyt puere:

 

Die tsmenschen leuen (niet tsijn) socht, so wy weten,

 

Belouende te bewaren veur ghetreure

 

Als sijn Oogh'appels, die hem volghden als veure.

 

Wie sou sulckx in der Onrusten bandt // stouwen?

 

Uerwaer niemant dus mach elck segghen hier deure

 

God gehoorsaem zijn, can in Rusten d'landt // houwen.

 

 

 

Hadden d'Israeliten niet met discoort // groot

 

Ghebroken Gods Wet, tot diuersche stonden,

 

Hun Landen en waren soo dick niet verstoort // bloot,

 

Noch sy gheuanghen ghevuert, smadich ghebonden.

 

Hadde Pharao ghehoort Moyses vermonden,

 

D'Egiptisch Landt en waer niet ghequelt met veel plaghen.

 

En hadde God Adammen gehoorsaem vonden,

 

Hy had hem niet in d'onrustich Dal ghesonden:

 

Maer in Rusten ghehouden alle sijn daghen.

 

(D'welck wy alle, eylaes, wel moghen beclaghen)

 

Abraham was gehoorsaem deur sgheloofs wercken,

 

En God heeft veur sijn Ruste sorghe ghedraghen.

 

Ia alle Menschen onder sijn saets vlercken

 

Ghebenedijt. Hier wt elck d'Onrust mach mercken

 

Die d'Onghehoorsame met boosheyts handt // brouwen,

 

En al loochendent dan Leecke en Clercken,

 

God gehoorsaem zijn, can in Rusten d'landt // houwen.

§ Prince.

Laet ons dan eens ghesint, als Christen broeders // fijn,
Gheloouich gehoorsaem wesen d'woordt des Heeren,
En haer alleen die der Sielen behoeders // zijn

[fol. 46v]

 

Betrouwen, navolghen, en dat voort leeren,

 

Soo sal ons Rust' inder Eewicheyt vermeeren:

 

Want God sal (seydt hy) haere Landen toevoeghen,

 

Die met Ghehoorsaemheyt sijn Stemme eeren,

 

Ure en Ruste, haren Druck in Ureucht verkeeren,

 

Soo dat sy slapen sullen na haer ghenoeghen:

 

Ia, hondert Uyanden (die haer gheerne sloeghen)

 

Sullen veur vijf vlien, vallende in haer sweerden:

 

Reghen t'sijnder tijdt, bequaemheyt om ploeghen

 

En sayen, met Uruchtbaerheden der Eerden,

 

Sal hy haer oock gheuen, ist dat sy volheerden.

 

Ghy die Eyghen raet wilt tot eenen pandt // trouwen,

 

Leert hier wt, dat bouen macht van volck en peerden,

 

God gehoorsaem zijn, can in Rusten d'landt // houwen.

§ Liedeken op de wijse,
Een Venus dier // Houdt my in haer bestier.

GHy Adams saet // heel van Natueren // broos,
Ghy zijt altoos // Gods Woorden teghen:
Den Eyghen raet // van uwe kueren // loos,
Acht hy zeer boos // wat baet ghesweghen.
Al wilt ghyen Goet wtlegghen,
God wil dat elck sal // volghende sijn Woorden al,
Altijt Niet mijnen wil segghen.

Wilt dan met God // niet argueren // fier,

Als hy v schier // wat schijnt verlaten:
Maer na t'Ghebod // v reguleren // hier,
Als d'eewich vier // t'Goetduncken haten.
Op Gods Goetheyt wilt betrouwen,
Sijnen tijt verbeydt // in en wt de Hel hy leydt,
Slaende die hy wil behouwen.

[fol. 47r]

 

Niet totter doot // en zijn sijn slaghen // maer

 

Gheneeslijck claer // wy sient voor ooghen:

 

Al schijnen groot // der Sonden plaghen // swaer,

 

Hy sal voorwaer // gheensins ghedooghen,

 

Dat sijn Schepsel hier sal lijen

 

Iet bouen de macht // : want sijn ontfermende cracht

 

En stelt hy niet heel besijen.

 

 

 

Als Israel // swaerste beladen // was,

 

En op dat pas // doot meynden blijuen,

 

Deur t'goet opstel // sijnder Ghenaden // ras,

 

Hy doen ghenas // mannen en wijuen.

 

Oock sprack Iob den wtvercoren,

 

God neemt dat hy gheeft // dies hem den Heere doen heeft

 

Meer ghegheuen dan te voren.

 

 

 

Siet ende merckt // wat hy den sijnen // doet,

 

Uol Rusten goet // can hy elck maken.

 

Dus weest versterckt // met eenen fijnen // moet,

 

(Gheluck en spoet // mach v weer naken)

 

En wilt s'Propheets woordt indrucken,

 

Woude den Pot slecht // den Backer maken ghevecht,

 

Hy souden breken in stucken.

 

 

 

So soude oock v // zeer saen gheschieden // dan,

 

Woudt ghy (een man //) den Schepper quellen.

 

Want niemandt nu // God hier ontvlieden // can:

 

Al liep hy van // hier totter Hellen,

 

Al clom hy ten Hemel bouen,

 

En cost hy ghereet // vlieghen ouer de Zee breet,

 

Hy isser oock, weerdt om louen.

[fol. 47v]

 

Daeromme noch // beter beghinnen gheen,

 

Dan veur hem reen // kennen sijn Sonden,

 

En segghen och // in mijn versinnen // cleen,

 

Ben ick alleen // de quaetste vonden,

 

Wilt my Heere niet verdoemen:

 

Maer leydt my (die stil // ben bereet) na uwen Wil.

 

Salich hoortmen hem sulck noemen.

§ Prince.

Als Prins loyael // hy haer (diet hoeden // meest)

Deur s'Wijsheyts keest // dan vrijdt van schanden,
En princepael // verdrijft den droeuen // gheest:
Die in tempeest // brenght alle Landen.
Ia oock tot alle haer dinghen,
Gheeft hy tijt bequaem // reghen goet en aenghenaem:
Wilt hem toch met Lofdanck singhen.