Refereynen ende liedekens

[fol. 37r]

§ Refereyn 16.

Wijngaert rancke tot Berchem.
Niet sonder Godt.
Den Gheest verheucht.

OCh hoe is mijn Siele van binnen gheturbeert,
Om dat d'Ongherechticheyt nu soo regneert,
Dwelck men siet ghebeuren van daghen tot daghen,
Den Uadere teghen het Kindt rebelleert,
Tkindt teghen den Uader leydt subtijle laghen,
D'een doet ghewelt, d'ander wordt doot gheslaghen:
De Moeder doet de Dochter aen groot verdriet,
T'ghebeurt in alle Landen weirdt, om beclaghen,
Daer is oock Raet teghen dat dit niet en gheschiet,
Gheeft de Gramschap gheen plaetse, v boosheyt vliet,
Schout de Leughene, soo mach v beclijuen
De Waerheyt, dit helpter toe, soo elck siet:
Want t'brenght Liefde onder Mannen en Wijuen:
Daermen Tweedrachticheyt me can verdrijuen,
Elck heb dan met alle menschen vre, eens ghesint,
Want t'Uoetsel der Landen rust is (en salt blijuen)
Dat ghy uwen Naesten, als v seluen, bemint.

Ist dat elck eene sijnen Naesten goet,

Als hem seluen bemint, doende met luste soet
Een ander dat ghy wilt dat v sou ghebeuren,
T'onrecht en salder worden ghestort gheen bloet,
Inde Landen en sullen zijn gheen Erreuren,
Elck sal vreesen, en niemant en salder treuren,
Gheen Onghelijck en souder dan worden ghedaen,
De Schepsels souden verblijen t'elcker euren,

[fol. 37v]

 

Daer en sou niemant teghen d'Ouerheyt opstaen,

 

Elck sou t'Uleesch versaken, en na den Gheest gaen,

 

Ende op de Wet der Ghenaden bouwen

 

Den Bedroefden soudense troosten saen,

 

Al dat teghen Godt is souden sy schouwen,

 

Op Godt soudense stellen haer betrouwen,

 

Alle Goet doende, d'welck het Quaet verwint,

 

Dit can de Landen in Rusten houwen,

 

Dat ghy uwen Naesten, als u seluen, bemint.

 

 

 

Niet dat ghy sult beminnen die alleene

 

Die v beminnen, en andere gheene:

 

Maer bemint uwen vyandt, t'zij van wat Staten,

 

Dit heeft ons Godt beuolen wt Liefden reene,

 

Dat ghy soudt lief hebben die v haten,

 

Honghert haer, spijstse wt Charitaten:

 

Bidt oock voor die ghene die v aendoen Lijen,

 

Wilt voor v vyanden v leuen laten,

 

Ghebenedijt die v vermaledijen:

 

Dit soude de Landen van Onrust bevrijen,

 

En elck eene sou in Rusten zijn gheseten,

 

Niemant en sou teghen den anderen strijen,

 

Noch eenichssins hier na t'hoochste vermeten,

 

Elck soude ootmoedich zijn, als de Propheten:

 

Want dit can de Landen (soo den Gheest ontbint)

 

In Rusten houden, dus en wilt niet vergheten,

 

Dat ghy uwen Naesten, als v seluen, bemint.

§ Prince.

Die sijnen Naesten bemint, is wel bedacht,

Als hem seluen, die heeft de Wet volbracht,
Ende sullen rechtveerdich zijn, en welvaren,

[fol. 38r]

 

Want sy beminnen Godt wt ganscher cracht,

 

Wt ganscher Herten sy zijn Ghebodt bewaren,

 

Om Ghelt sy niemanden en beswaren,

 

Inde Rechtveerdicheyt sy altijt leuen,

 

Sy zijn vierich inden Gheest als Godts scharen,

 

Sy en bedrieghen niet, maer elcken t'sijn gheuen,

 

Ongheveynst zijnse, soo daer staet gheschreuen:

 

Ia reyn van herten, ende niet oneerbaer,

 

Sy vreesen Godt, oock sy niet en beuen,

 

Uoor vier, noch voor eenich perijckel daer:

 

Sy volghen oock dat Licht des Werelts claer,

 

God beschermtse als een moeder haer kint:

 

Dus houdtmen de Landen gherust, sorght dan eenpaer

 

Dat ghy uwen Naesten, als v seluen, bemint.

§ Liedeken op de wijse, Een ionck Heerken vraechde my. Oft op de wijse,
D'ou vient cela. &c.

OPent v Ooghen ghy die daer zijt verblint,
Aenmerckt de Goetheyt des Heeren,
Hy heeft ons als sijn Kint bemint,
Daerom wilt sijn Woordt altijt vermeeren.

Eerst heeft hy ons wt Egypten gheleydt,

En ons bevrijdt van Pharaos handt,
D'Landt der Beloften heeft hy ons bereydt,
Godt heeft ons ghedaen groot onderstandt.

Doen wy noch in dwalinghen waren gheraeckt

Soo heeft Godt den Uader gheordoneert,
Hy heeft ons de Wet der Salicheyt ghemaeckt,
Daer de Propheten af hebben ghepropheteert.

[fol. 38v]

 

Als Godt aensach, soo wast ghedaen,

 

Ons verdriet dat wilde hy stelpen,

 

Ons Mensschelijckheyt heeft hy ghenomen aen,

 

Om dat hy ons tot Salicheyt soude helpen.

 

 

 

In ghedaente des Gheests is hy ghedaelt

 

In een Urouw, en wilder af zijn gheboren,

 

Doen wy int duyster saten, heeft hy ons wt ghehaelt

 

Om dat wy niet en souden gaen verloren.

 

 

 

God heeft dryendertich Iaer

 

De Werelt met Droefheyt betreden,

 

Hy heeft ons ghegheuen sijn Ghenade eerbaer,

 

Den Uader oock voor ons ghebeden.

 

 

 

Sijn Leuen heeft hy voor ons allen ghestelt,

 

Een Testament achter ghelaten,

 

Om Gout, noch om Siluer, noch om Ghelt,

 

Maer alleen wt puerder Charitaten.

§ Prince.

Ghy hebt ghehoort wat Christus Goetheyt doet,

Looft en danckt hem met Uerstande,
Hy heeft ons ghedoopt al in sijn Bloet,
Siel en Lijf stelde hy voor ons te pande.