Refereynen ende liedekens
(1563)–Anoniem Refereynen ende liedekens–
Auteursrechtvrij§ Ulissinghen in Zeelandt.
| |
[Folio 13r]
| |
Deur Ghehoorsaemheyt bewijst ons Schriftuere
Dat Godt gheeft een Landt tot eewigher ure,
En maect ons een volck bouen alle Natien,
Zijn wy hem ghehoorsaem, soo statet pure,
Hy bewaert ons van scandalisatien,
En ghebenedijt ons in sijnder Gratien,
Hy ghebenedijt ons landen metten vruchten,
Ons Ossen en Schapen tot elcker spatien,
Gaen wy wt oft in, wy en deruen niet duchten,
Wy zijn ghebenedijt auont ende nuchten,
Hy ghebenedijt ons met ouervloedicheyt:
Zijn wy onghehoorsaem, t'is kermen en suchten,
Wy sullen hebben alle Teghenspoedicheyt,
Gheen Ghebenedijdinghe, al Weemoedicheyt,
D'blijft al vermaledijt wat dat ghy boudt,
Om s'Menschen salich wesen, en behoedicheyt,
Godt gehoorsaem zijn, eest dat d'landt in rusten houdt.
Spreeckt die Heere niet tot Salomon openbaer,
Houdt mijn Gheboden, ick seght v voorwaer,
Den Stoel ws Rijckx die sal ick vermeeren,
Maer zijdy my onghehoorsaem, ick seght v claer,
Mijn Aensicht sal ick van v landen keeren:
Uerliesen wy dan de Urede des Heeren,
Wat sal ons anders dan Onruste gheschien:
Laet ons gehoorsamich sijn Gheboden leeren,
Soo hebdy Urede, nae Esaias bedien,
Want hy vervloeckt de Ongehoorsamighe lien,
En wilt sijnen Urede van henlien decken,
Alle den vrolijcken sanck sal van hem vlien,
De stemme des Bruydegoms sal vertrecken,
| |
[Folio 13v]
| |
De landen sullen woest zijn t'allen plecken,
Aldus zijt ghehoorsaem eer dat v beroudt,
Ghehoorsaemheyt doet den slaep van sonden wecken
Godt gehoorsaem zijn, eest dat d'landt in rusten houdt.
| |
§ Prince.Godt Ghehoorsaem, is den offer rijckelijck,
Soo dat Ecclesiasticus thoont blijckelijck,
Ghehoorsaemheyt heeft den Uader begheert,
Christus ghehoorsaem te sijne ghelijckelijck,
Opden berch van Thabor broeders vermeert,
Christus heeft oock die Ghehoorsaemheyt aenveert,
Niet mijnen wille Uader, maer uwen gheschiet,
Hy heeft ons wt dat net der sonden ghecleert,
En Syon ghebrocht in Rusten sonder verdriet,
Leuen wy dan soo die Ghehoorsaemheyt ghebiet,
Soo sullen wy al beminnen Godt alleene,
Liefde en Eendrachticheyt Broeders aensiet,
Ghehoorsaemheyt volcompt dat Ghebot ghemeene,
Laet ons hem ghehoorsaem zijn niet af te scheene,
Dat seg ick v claerlick, hier op al betroude,
Om s'Mensch salich wesen groot en cleene,
Godt gehoorsaem zijn, eest dat d'landt in rusten houdt.
| |
§ Liedeken.AEnhoort Syon mijn Bruyt,
Des Bruydegoms soet gheluyt,
Ontsluyt hem uwer deuren,
Ick brengh' v in dat Cruyt,
Mijn hooft is om v Uirtuyt
Uol Daus, en wilt niet treuren.
| |
[Folio 14r]
| |
Mijn Bruyt heeft nu ghehoort
Haer Bruydegoms soet Accoort,
En d'woort // van haer beminden,
Sy is ghecomen voort,
Daer sy dede haer rappoort,
Waer sal ick hem gaen vinden.
Des s'nachts heeft sy ghesocht
Die haer Siele heeft ghecocht,
Ghebrocht // wt allen Sonden,
Metter Liefden ghewrocht,
Dat sijn Bruyt wel heeft bedocht,
Dus heeft sy hem gheuonden.
Compt mijn Uriendinne ient,
Om dat ghy mijn stemme kent:
Uoleynt // is swinters dwinghen,
Den Reghen is absent,
Die Bloemkens staen hier ontrent,
Den Somer doet voortbringhen.
De Tortelduyue goet,
Men hoort nu haer stemme vroet,
Zeer soet // hier inde Landen,
Den Uijgheboom behoet,
Dat hy sijn knopkens ontdoet,
Met reucken veelderhande.
Compt nu in mijn playsant,
By my wter Leeuwen tant,
Een Landt wordt v ghegheuen,
U Borstkens triumphant
Schoon bouen Wijn vaillant,
Compt wilt nu rustich leuen.
| |
[Folio 14v]
| |
O Bruydegom mynioot,
Ghy die zijt wt ende root,
En groot // zijt ghy vercoren,
Ick lach in wederstoot,
Belast met d'eewighe Doot,
Ick ben deur v herboren.
| |
§ Prince.Princen als nu verheucht,
Met een Broederlicke Ieucht
Sticht vreucht // inde landouwen,
Ghehoorsamich thoont Deucht
Uwen Heere, op dat ghy meucht
Dat Landt in Rusten houwen.
|
|