Refereynen ende liedekens
(1563)–Anoniem Refereynen ende liedekens–
Auteursrechtvrij§ Marien Cransken tot Bruessele.
| |
[Folio 15r]
| |
Heeft inneghestelt, tot straffinghe, befaemt
Den Ongehoorsamighen: waer door (sonder spot)
Men de Landen can houden in Rusten versaemt,
Als d'Ouerheyt ghehoorsaem is Godts Ghebot.
Dus d'Ouerheyt gehoorsaem Godts gebot machtich,
Leuen de landen in Rusten eendrachtich,
Want sy en zijn anders niet doende goet noch quaet,
Dan Godt selue en beueelt warachtich,
Als Coninck Aza, en Ioas delicaet,
Die anders niet dna ghehoorsamighe daet
En deden, waer door Godt haer verleende wel
Rust en Urede in allen haer Landen ornaet:
Dus wilt toch voor haer bidden naer Godts beuel,
Ghehoorsaemheyt, Eere, is men sonder wtstel,
Tol, Schattinghe, en Tribuyt, naer haer bede,
Haer schuldich: diet wil wederstaen, zijnde rebel,
Wederstaet Godts Gebot: siet t'sweert is haer te stede
Gegheuen van Godt, tot wrake, niet tot vrede
Des quaetdoenders: maer den goeden een salich lot,
Dus houdtse de landen in Rusten hier mede,
Als d'Ouerheyt ghehoorsaem is Godts Ghebot.
Maer als d'Ouerheyt leeft naer svleeschs begheren
En door boosheyt Godts Ghebot contrarieren,
Mits d'Onghehoorsaemheyt tot elcken termijne,
Sulck Landt naeckt Onrust, sonder faelgieren,
Tblijckt aen Pharao, diemen sach smaken den brijne
Int Zee, en in groot Onrust quamen sijn landen,
Door sijn Ongehoorsaemheyt, wreet van aenschijne:
Tsghelijckx door Israel (tsy haerder schanden)
| |
[Folio 15v]
| |
Misdaet, worden gheleuert haer vyanden,
Cause van dien, was d'Onghehoorsaemheyt:
Tsghelijckx Dauid, oock Salomon die vaillanden
Deden Ongehoorsaemheyt, waer door saen was bereyt
Grooten twist, en Onrust: maer diet tselue feyt
Uerlaten hebben, volghende d'Beuel van Godt,
Dan quamen de Landen in Rusten onghescheyt
Als d'Ouerheyt ghehoorsaem is Godts Ghebodt.
| |
§ Prince.D'Ouerheyt moetmen ghehoorsaem wesen,
Ghelijck Christus ghehoorsaem was ghepresen
Sijnen Hemelschen Uader, als behoort,
En onghehoorsaem noyt en is gheresen
Uan hem: in sulcke weghen volcht Christus voort
T'ghehoorsamich Ghebot van t'Goddelijck woort,
Soo suldy die eerlijcke Ruste schoone
Besitten, daer de doot is (naer t'schrifts rappoort)
Uerslonden in de Uictorie ydoone:
Maer gheeft God dat God toebehoort inden throone,
En den Keyser dat hem toebehoort, want
Ghehoorsaemheyt houdt den Mensche persoone
In Gherusticheyt sonder de welcke (triumphant)
Gheen Rijcke en bleeft gheduerich playsant,
Noch Ghemeynte en wort gheregeert, iae vatet tslot,
Niet en blijft in Rusten dan door haer elegant,
Als d'Ouerheyt ghehoorsaem is Godts Ghebot.
| |
§ Liedeken op de wijse, Ontwaeckt ghy Menschen ouer al. Psal. 51.DIE met Babel hebt ghedroncken,
Uan tgheen dat sy heeft gheschoncken,
| |
[Folio 16r]
| |
Uan haer wilt nu toch scheyen,
Wilt niet achten op haer soet loncken,
In Christus Woordt wilt vermeyen.
Wat wilt ghy glorieren stout
In v quaetheden menichfout,
Den Heer compt ons te baten
Die in sijn Woorden altijt betrout
Hy en salse niet verlaten.
U Tong heeft willen den heelen dach
Boosheyt dencken (met groot gheclach)
Ghelijck t'scheermes can crincken,
Soo dedese wee, roept nu o wach,
Wilt anders v toch bedincken.
Tquaet hebdy bouen het goet bemint
En lief ghehadt, dit wel versint,
Die den goeden brachten te dale,
Daerom v seluen, nu toch kint,
Uerlaet nu alsulcke quale.
Daerom sal v Godt bederuen saen,
En wtroeyen (hoort mijn vermaen)
Uander Eerden, en v saet mede,
Want ghy veracht den Heere plaen,
Ghy schout altijt oock den Urede.
Dit sullen de Rechueerdighe sien,
En vreesen (eylasen) tsaen gheschien,
En spreken t'uwer cleynder eere,
Siet dese Mensche, vatet t'bedien,
Heeft verlaten Godt sijn Heere.
| |
[Folio 16v]
| |
Op sijn vermenichfuldich goet
Hoepte hy vol ydelheyts onsoet:
Maer Godt woude my bewaren,
Als een Olijf, hoept' ick metter spoet
In Godts Woordt, sonder beswaren.
| |
§ Prince.O opperste, edele Princier,
U salich lof bewijsen hier,
Uwen Naem verwachten en prijsen,
Want hy is goet int aenschijn fier,
U Heylighen dat bewijsen.
|
|