Refereynen ghepronunchieert opte intreden binnen der stede van Delft

[fol. G4v]

Rotterdam.

Refereyn.

Alsomen mach aen alle manieren, mercken
So en werter door smenschen verstant niet goets gheuonden
Dat hem totter salicheyt mach goedertieren, stercken
Want tis al ydel dat sy doorhaer versieren, wercken
Soo Paulus totten Romeynen ons heeft ontbonden
Nu smenschen verstandt binnen swerelts Ronden
Mach by Godts wijsheyt hier bouen, niet zijn gheleecken
Want sy zijn contrary malcander als deucht en sonden
En eyghen verstant moet den mensch eerst van hem steecken
Als hy yet dat hemels is, van Godt wil smeecken
Want de veranderinghe in hem moet Godt aenrichten
Als ghy my bekeert, Heer, dits Ieremias spreecken
So ben ick bekeert want ghy alleen moet my verlichten
Dus can smenschen verstant in de herboorte niet stichten
Maer alleen tot tijdtlicke haef // so ick hier beueste
Dies segh ick als alle historischriuers dichten
Dat d'aerd vvercken t'svvaerste is, en inde vverelt t'beste.

Smenschen verstandt als ick heb bevvesen daer
Is niet dan eyghen vernuft, in Godtlicke dinghen sodt
Door welcx verstandt alsoo wy lesen claer
Wy niet connen comen t'welck is te vresen, swaer
Tot het alderbeste namelick tot godt
Maer alleen binnen tdal der traennen tverganckelick slodt
Mach t'menschelick verstant yet tijdtlicx practiseren
Niet hemels maer aerdts, waer door hy vergeet Godts ghebodt
Want wat isser schalckers, dan vleesch en bloet inuenteren
Doch isser yet tswaertste en tbeste wel te iugeren
Ons menschen nuttelick hier ter werelt binnen
Door smenschen verstant gheuonden dat sal ick beweren
Dats d'aerde te wercken oorbaerlick met sinnen
Welcken eersten autheur men in Genesis mach vinnen
Namelick int vierde, ick laet varen de reste
Van gheleerde Philosophen die met mijn bekinnen
Dat d'aerd vvercken tsvvaertste is, en in de vverelt tbeste.

[fol. H1r]

 

Gheen svvaerder hanteringhe men ouerdencken, mach

 

In swerelts rontheyt, dan twerck der aerden

 

Noch gheen beter Iuweel men yemant schencken, sach

 

Dan de swarte aerde ons toe te wencken, plach

 

En noch daghelicx biet, met grooter waerden

 

Alsmen haer is werckende so ick voor verclaerden

 

Welcx werck het swaertste is soot noch mach blijcken

 

Want sy wert bearbeyt met ossen en paerden

 

Hoe machmen swaerder inuentij daer by ghelijcken?

 

Aerde werck is paerde werck segghen arme en rijcken

 

Dus moetet het swaerste zijn wat wiltmen veel praeten

 

Oock ist het alderbeste van alle practijcken

 

Want d'aerde is ons alder moeder wie canse haeten

 

Iae oock teerste handtwerck van ons voorsaeten

 

Dus moetet het beste zijn int Oost en Tweste

 

So seg ick van dat smenschen verstant oyt conde vaeten

 

Dat d'aerd' vvercken tsvvaerste is, en inde vverelt tbeste.

 

 

 

Prince.

 

Prince noch sal ick met reden bevvijsen, hoort

 

Dattet het swaerste en tbeste hier ter werelt moet zijn

 

Hoe wel d'aerde goet is en haer elck te prijsen spoort

 

Onbewrocht salse brenghen onvruchtbare rijsen, voort

 

Maer door den arbeyt, en Godts segening Coren en Wijn

 

Alle cruyden der aerden comen ten schijn

 

Door den arbeyt tot onderhouding van smenschen leuen

 

Door d'aerde te wercken wert gheuonden menich mijn

 

Van gout en siluer, steenen en paerlen daer beneuen

 

Metael, Cooper, Tin, Yser, Loot, twert al ghedreuen

 

En met swaeren arbeyt wt d'aerde gheclooft

 

Hout en steen wert ons, deur d'aerde te wercken ghegheuen

 

Iae het elementsche vyer, wert daer wt gherooft

 

Somma door d'aerd' wercken coemt meest al dat den mensch behoeft

 

Ter werelt Godt gheef dat wy Rapen gheneucht int leste

 

Dus die met minnen versaempt sy solueren onbedroeft

 

Dat d'aerd' vvercken tsvvaertste is, en in die vverelt tbeste.

Liefde baert vrede, per Yselueer.