Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio H1v]
| |
Refereyn.Den mensche ter werelt in swaerheyt leuende
Door Adem die ons in lijden heeft ghebrocht
Daerom dat hy der vrouwen ghehoort was gheuende
Die welcke duer broosheyt eerstmael was sneuende
En heeft des doodts heerschappije op ons ghewrocht
So dat wy inde stricken des vyants waeren gheknocht
Dan door Christum zijn wy wederom beurijt
Die ons in dese werelt so seer heeft ghesocht
Met zijn bloet ghecocht wt des vyants strijt
Hierom v sonden voor den Heere belijt
Hebt liefde tot v naesten weest altijt waeckende
Weest naerstich arbeydende int aertsche crijt
Ende in v teghenspoet weet toch niet slakende
Verwacht uwen Heer weest altijt hakende
Keert v tot deuchden houdt Godt in eeren
Die hem in sulcx wel is vermaeckende
Al valtet hem eerst swaer het sal int beste verkeeren.
Die hem tot sulcken arbeyt opmaecken hier
En soucken eerst na dat leuende broot crachtich
All valt den strijt groot int aertsche Quartijer
Treckt nochtans voort met een goede manier
Denckt op uwen voorgangher hy is seer machtich
Wert een nieuw ghebooren creatuer all valt onsachtich
Treckt inden camp als een ghewapent helt
Hebt den schilt des gheloofs zijt altijt andachtich
Die dat verstant heeft is altijt gestelt
Om teghen den vyant te strijden met groot ghewelt
All loopt hy om v als een Leeuwe stout
Die v aen allen sijden bestoockt ende quelt
Hebt liefde voor ooghen het v niet en rout
Dat is het beste daer den mensche op bout
Op Godt betrout en wilt toch niet cesseeren
De Liefde te vinden is het beste gout
Al valtet hem eerst swaer het sal int beste verkeeren.
| |
[Folio H2r]
| |
Het swaerste te vinden voor den mensche voorwaer
Dat is de liefde tis seer te beclaghen
Haet ende nijt thoont hem nu wel openbaer
De Liefde vercout in des menschen herte swaer
Het gaet voor ende naer van daghe tot daghen
Nochtans spreeckt Paulus die na den prijs ghinck iaghen
Sonder Liefde voorwaer so en ist al niet
Al waert dat ick my totter doot toe liet plaghen
Mijn lichaem liet branden in groot vedriet
Hebbe ick gheen Liefde ten baet my niet een riet
Die schriftuer ouer al sy tuycht vande Liefde reyn
Daerom ist best die so inden arbeyt vliet
Hy salder mede winnen dat hemelsche pleyn
Dat ist beste te hebben dan yet anders certeyn
Laet ons daer toe arbeyden in deucht vermeeren
Christus te behaghen dat edelle greyn
Al valtet hem eerst swaer het sal int best verkeeren.
Prince.
O Alderhoochsten Prince die wy moeten louen
Ghy die de liefde zijt alleen verheuen
U singhen alle hemelsche schaeren loff daer bouen
Ende oock die hier ter werelt werden verschouen
Sullen met v eewelick in vreuchden leuen
Als ghy hebt ghesproken O Heer beneuen
Salich zijnse die hier arm zijn van geeste
Mijns Vaders rijcke wert hem ghegheuen
Ende den boosdader inder hellen feeste
Daer hy sal branden met swaere tempeeste
Dus wilt doch arbeyden na het hoochste rijs
Al valt het v swaer in dit foreeste
Die daer na zijn beste doet is te houden wijs
Wy wt iolijt vanden dorren spreken om prijs
Wy antwoorden noch naer Rhetoricaes leeren
Naer de liefde te arbeyden der sielen spijs
Al valtet hem eerst swaer het sal int beste keeren.
|
|