Refereynen ghepronunchieert opte intreden binnen der stede van Delft

[fol. G2v]

Schiedam,

Refereyn.

Of schoon door menschen verstant wert gheuonden
Wter aerden het gout seer swaer van ghewicht
En Edel gheacht want den onghesonden
Can door den Gheest des gouts werden ontbonden
Sijn cranckte, ia den leprosen het verlicht
En t'herte verfrayt den bedructen, zijn ghesicht
Al is Loot seer swaer, dat gout gaet hem te bouen
Maer noch is wichtigher saecke, door verstandt ghesticht
Die men beter als gout behoort te louen
In landen in steden en Heeren houen
Tis politijcke inuenti die daer bevrijt
Den onnoselen, hebbende oyt verschouen
Dat den eenen mensch, den anderen benijt
Oordeelt alle verstandighe, wie dat ghy zijt
Hoe goet en swaer, t'straffen is, van ouerdaet
Dus van smenschen vonden als, redene dat belijt
Tswaerste en t'beste is politijcke magistraet.

In Egypten leerde t'volck sulcx bekennen
Hermes Trismegistus, en was heerlick van wesen
Anders, roouen, moorden, en vrouwen schennen
Soumen den boosen niet moghen af wennen
Dus mach desen staet wel werden ghepresen
Hoe desen staet door smenschen verstant is gheresen
Thales die Asiaensche philosooph die heeft
T'ghemeente met voorsicht, gheleert van desen
Voort Draco in Griecken, maer Solon nae die dreeft
T'recht soeter als Draco, en wie dat leeft
Als rechter, wil hy, moet hem seluen reyn draeghen
Bias Prianeus, en Cleobulus, elck gheeft
Sulck oordeel want so die wijse, niet toe en saghen
Tqua sou t'ghemeen popul, meer alst goe behaghen
Dus van wat oyt den mensch vondt, segt ick noch soot staet,
Doer ingenieus verstant, t'blijckt noch in ons daghen
Tswaerste, en t'beste is politijcke magistraet.

[fol. G3r]

 

Siet op Licurgus die wetten hadde ghestelt

 

Den Lacedemoniers, hy heeft hem seluen betoont

 

Een voorbelt van zijn wetten verbiedende ghewelt

 

Midts een goeden voorganck den regenten ghelt

 

Aristoteles heeft den Iudices niet verschoont

 

Van Athenen, maer verweten hoe by haer gheloont

 

Wel werde met straffe dat quaet, maer selfs sy niet

 

En volquamen, die wet, daer die daet nochtans croont

 

Den Iudices, oock merckt hoe swaer dat gheschiet

 

Een te oordeelen ter doot, toch reden ghebiet

 

Den quaden te straffen, tis t'beste waerachtich

 

Dat den mensch oyt vant, anders den quaden en liet

 

Niet naer, t'steelen, roouen, en te zijn manslachtich

 

O Edel Iustiti die den boosen zijn machtich

 

Mits dat den boosen zijn boosheyt niet naer en laet

 

Van allen smenschen vonden segh ick voordrachtich

 

T'swaerste en t'beste is politijcke magistraet.

 

 

 

Prince.

 

Seneca leerde princelick regeren

 

Voort Cicero, Demostenes, al constich van aert

 

En Virgilius den poët, oock doort hanteren

 

Van boosheyt om datmen niet zou ruineren

 

Elck ander, hebben die Roomeynen wetten vergaert

 

Sulcx Marcus Aurelius ghenoch verclaert

 

Op dat daer een Monarchie soude blijuen

 

En t'ghemeente van ouerlast zijn bewaert

 

Door Princen en Raden die de landen verstijuen

 

Niemant gheen ontsinnicheyt sou moghen bedrijuen

 

So dat die menschen, moeten wetten weten

 

T'mach sielen verdoemen wie sal swaerder beschriuen

 

Wat soumen oock beter te zijn moghen heeten

 

Van daer t'menslick verstant hem heeft in ghequeten

 

Inuenterende Iustiti om te straffen t'quaet

 

Dus derf ick my vry wt te segghen vermeten

 

T'swaerste en t'beste is politijcke magistraet.

Ansiet die jonckheyt.