Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio G1v]
| |
Refereyn.Den mensch heeft hem van naturen tot boosheyt begheuen
Van hem seluen heeft hy niet goets in dit leuen
Daer toe is het met verdoruentheyt beladen
Hier teghen zijn recepten medecijnen beschreuen
Daer dese siecten werden mede verdreuen
Om tleuen te behouden wie sout versmaden
Tsijn de goede wetten die v raden
Tot eendracht goede oorden ende vreden
Burgherlijcke ordonnantien dit zijn de paden
Die v tot enicheyt en ruste leden
Sonder statuten polecijen inder waerheden
En mach eenighe nacy tsamen blijuen
Wilt woest onghehoorsaemich sou een yder treden
Moet wil onurede tweedracht sou bouen drijuen
In ongheschickthyt sou hem elcx verstijuen
Dus segh ick de wetten hier teghen gheuonden
Is tswaerste en tbeste in des swerelts ronden.
De goede wetten is tleuen der steden dits claer
Also ons Plutarchus bewijst voorwaer
Sy zijn oock der steden vaste banden
Sonder polecijen oft wetten sout wesen swaer
Niemant en soude vreesen niet een haer
Als Sodoma en Gomorra quamen wy tot schanden
Och hoe vreemt sout gaen in allen landen
Ouerheyt Iustitie twaer al verloren
Moorden vrouwen schenden ende branden
Ergher dan Iesabels boosheyt soumen horen
Hier teghen is niet beter, ken salt niet versmoren,
Dan de goede wetten om nae te reguleren
Doer datmer veel nae de boosheyt siet sporen
Sonder wetten hoe sout gaen onder knapen en Heren
Dit mach een yeghelijck wel considereren
Daerom verhael ick de wetten tot desen stonden
Is tswaerste en tbeste in des werelts ronden.
| |
[Folio G2r]
| |
Datse tswaerste en tbeste zijn, is wel bekent
Men macht mercken an Trismegistis die hem heeft ghewent
Om de wet te gheuen somen is anschouwende
Die rebellicheyt was so vast gheprent
D'menschelijcke gheslacht oock seer gheschent
Gheen wetten of polecijen waren sy houwende
Met grooten arbeyt en moeyte was hy ontfouwende
De wetten die daer noodich waren in dien tijt
Rhadamantus, Licius, waren oock betrouwende
Om in te stellen de wetten seer subijt
Om tquaet te verlaten tgoet te brenghen met vlijt
Noyt swaerder saeck en mochtmen anvaerden
Draco, Minos, hebben om den haet en nijt
De wetten oock ghegheuen op deser aerden
Twas tot vreden en eenicheyt dat sy verclaerden
Daer om de wetten wt haer natuerlijck ontbonden
Is tswaerste en tbeste in des swerelts ronden.
Prince.
Plato beschrijft sonder de burgherlijcke wetten
En can gheen huys gheen stadt wie sout verpletten
Gheen nacije, gheen landt, gheen volck blijuen staen
Iae de natuere seluer wie macht versetten
Oock so en can dat niemandt beletten
Dat het van den anderen sou moghen gaen
Ghelijck het verstant wilt dit mercken saen
Dat men siet dat het gheheele lichaem regeert
Met alle zijnen aderen zeer wyt ontdaen
Also werden de steden so Plato heeft gheleert
Onderhouden en blijuen eendrachtich gheeert
Doer de aderen der wetten in dese daghen
Men siet kennis wijsheyt wert daer deur vermeert
En tweert van ons alle boose plaghen
T'wil dat den eenen den anderen liefde sal draghen
Daerom verswijch ick niet de wetten naer mijn vermonden
Is tswaerste en tbeste in des swerelts ronden.
Den Olijuenboom t'Spruyt wt lieft. |
|