Refereynen ghepronunchieert opte intreden binnen der stede van Delft

[fol. F4v]

Den Haghe.

Refereyn op de Uraghe:
VVat tswaerste is en tbeste binnen swerelts ronden
Dat deur smenschen verstant oyt is ghevonden?

Alsmen nae smenschen verstant wil weten entelick
Wat tswaerste en tbeste is ter werelt binnen
So segghe ick en salt bewijsen presentelick
Dattet is de Letterconst excellentelick,
Swaerder noch beter heeftmen noyt connen versinnen.
Eerst datse tswaerste is (om wel te beghinnen)
So moetse de Ionckheyt allencxkens nemen aen
Deur veel arbeyts en tijts moetmense ondervinnen
In waecken, in soberheyt, en langduerich vermaen
Deur Orthographiam wy de letters eerst verstaen
⁺Onderscheydende consonanten wt vocaelen
Dan Prosodiam om totte Syllaben te gaen
Wt Ethimologiam wy de woorden haelen
En daernae Syntaxim om niet te dwaelen
Daer wt alle sententien voeden abundant
Dus tswaerste en tbeste is gheseyt sonder faelen
De Letterconst als gheuonden by smenschen verstant.

Deur dese const worden ons gheopenbaert
Alle andre consten groot van reputatie
⁺De excellente Grammatica zy ons verclaert
Dialectica, Rhetorica constich van aert
⁺En Geometria sonderling van gratie
⁺Arithmetica een Const vol van laudatie
⁺Musica die ons verlusticht deur Hermonijen
⁺Astrologia van grooter Estimatie
⁺Mette nottelicke const der Chirurgijen
⁺De Medicijnen die ons van sieckten bevrijen
⁺Den Herbarius seyt ons der cruyden crachten
⁺Veel oirbaers coemt ons wter Cosmographijen
Vitruvius verthoont ons veel schoone ambachten
Die wy al deur de letter Const waerdich om achten
Vercreghen hebben deur de arbeydende hant
Hierom tswaerste en tbeste is nae mijn ghedachten
De Letterconst als gheuonden by smenschen verstant.

+ Polid. verg. qui primus literas inuenerit & earum numero aucto, varierate, vi, atque sono Capit. vi.

+ Idem, de origine. Cap. vii.

+ Iden, C. xvi. & xiii.

+ Idem, C. xviii.

+ Eodem Cap.

+ Idem, Ca. xv.

+ Idem, C. xvii.

+ Idem, Ca. xx.

+ Eodem Cap.

+ Ptolomeus.

[fol. G1r]

 

⁺Doude Philosophen hier deur noch leuen

 

Als Plato, Phitagoras, Seneca by naem

 

Iustinianus heeft ons de rechten ghegheuen

 

Wtgheleyt en by veel Doctooren beschreuen

 

Dies wy kennis hebben vande gheleertheyt bequaem

 

⁺Cato Censorinus en Ciceroes faem

 

Liuius historien der gesten van Roomen

 

Deur Flauij Iosephi schriften lofsaem

 

Der Iooden gheschiedenis wy hebben vernoemen

 

Wetten en Rechten tot voorstant der vroomen

 

Worden hier deur gheuonden in elcken staet

 

⁺Milenus vanden Danubius ghecomen

 

Hooren wy noch doen zijn clachte voor den Senaet

 

⁺Dantwoorde van Appollo gheeft de Flamines Raet

 

Twelck ons al comt deur dese const elegant

 

Tswaerste en tbeste is dan sonder verlaet

 

De letter const als gheuonden by smenschen verstant,

 

 

 

Dese const, edel Princen, aenmerckt nu principael

 

Als d'oorsaecke van alle goet talder uyeren

 

Sy beschrijft der Sibillen prophetien te mael

 

⁺Tschepsel des hemels en aertrijcx int generael

 

Toude Testament vol godtlicke figuyeren

 

T'euangelie mette waerachtighe schriftuyeren

 

Daer wt onse salicheyt is ghecomen voort

 

Sonder dit tmenschelick gheslacht mostet besuyeren

 

Want niemant hadde gheweten van tgoddelicke woort

 

Noch van Sacramenten of nieuwe gheboort

 

⁺Daer veel gheleerden schriftelick van narreren

 

Daghelicx gheeft ons dees const diuersch confoort

 

Instrumenten en brieuen doet sy passeren

 

De mandaten vande ouerheyt en Heeren

 

Waer deur in politie ghehouden wordt het lant

 

Tswaerste en tbeste is dan sonder simuleren

 

De letter const als gheuonden by smenschen verstant.

+ Idem Polid. Verg. de origine philoso. cap. 16, Barth. Bald, &c.

+ Marc. Aurel. cap. 25.

+ Idem cap. 23. & 24.

+ Idem in episto, 10.

+ Genes. cap. 1. Biblia cum Prophetis. Mattheus, Marcus, Lucas, Ioannes, Paulus, &c.

+ Gregorius, Ieronymus, Ambrosius, Augustinus, &c.