Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio F2v]
| |
Refereyn.Daer en is niet nieus so Ecclesiastus seyt,
Byden menschen gheuonden off tis ydelheyt
Al achtment als een feyt // voor tbeste hooch en swaer
Want smenschen eyghen verstant so Paulus wtleyt
Is niet gheacht by Godt der heerscharen Maiesteyt
Diet al in allen bereyt // dat deuchtlick is voorwaer
En dat door die mensch, die hy zijn gheest gheeft dats claer
Daer hy veel wercken wonderlick door doet blijcken,
O wat mach nv tswaerste end' beste zijn dat daer
Oyt by die menschen gheuonden is vol pracktijcken?
Den Acker te bouwen sou dat niet ghelijcken
Tswaerste en tbeste te zijn dat Cheres eerst vant
Off heeftet Iason ghewracht d'eerste die ginck strijcken
Met schepen te zeylen door zee naer Colcus het Sant
Dit is wel goet, maer Dauid hadt een ander verstant
Hy seyt het beste te zijn by den mensch gheuonden
Betering van leuen en berou van sonden.
Dat alle Consten zijn door Gods Gheest wt ghegaen
Dat so machmen wt Gods woort tot Moyses verstaen
Wat Godt heeft ghedaen // metten man Beselyel,
Ick heb hem mijnen gheest ghegheuen doet Godt selff vermaen
Daer beneuen oock zijn knecht en suldy niet versmaen
Maer hem ontfaen // hy voldoet al v beuel
Dus hoe wijs hoe cloeck, hoe subtijl off hoe snel
Dat des menschen vernuft is cloeck van inuentie
Hy heeftet van Godt ontfanghen verstatet wel
Als Esculepius daermen off maeckt mentie
Met Hypocrates die door cloecke scientie
Zijn de eerste Inuenteurs vander Medicijnen
Die daet is swaer end' goet van eloquentie
Maer die van Niniue sachment al swaerder pijnen
Want den Coninck ordineert voort beste den zijnen
Een rechte penitentie die doet oirconden
Betering van leuen en berou van sonden.
| |
[Folio F3r]
| |
Den wijsen Solon wiens verstant is verschenen
Int ordineren des wets voor die van Athenen
Tot straffe den ghenen // die leefden onredelick
Dit is wel tswaerste end' beste soudick meenen
Off den vromen Lycurgus niet om vercleenen
Die brengt tot weenen // het wilde volck wreedelick
In Lacedemonien, dat hy seer vreedelick,
Regeert, door zijn polotien en ghesetten
Ick houde seer goet dees manieren seedelick
Maer opten wijsen Donatus moetmen oock letten
Die den letteren eerst vont waer door die wetten
Altijt in grooter gheheuchghenis zijn ghebrocht
Maer als hem Ezechias hadt gaen besmetten
Wat isser doch voort beste by hem ghewrocht
Maer claghen, weenen, en suchten is by hem ontknocht
En ordineerde hem seluen in corter stonden
Betering van leuen en berou van sonden.
Prince.
Prince het swaerste deur smenschen verstant ghecomen
Dat is die sonde die den mensch gaet verdomen
End' beste wtghenomen // is oprecht leetwesen
Die Cananeetsche vrou gheraeckte die somen
Centurio die hem toonde als den vromen
De sondaer diemen sach schromen // zijn al ghenesen
Door waerachtich berou bouen al ghepresen
Door Petrus seer swaer den Heer heeft gherenonceert
Hy achte voor tbeste hartlick berou van desen
Magdalena die swaer in sonden was ghekeert
Toonde oock het beste dat oyt mocht zijn begheert
Een verneerderden gheest, tot die voeten des Heeren
Het welcke Christus voort beste heeft ghecomfirmeert
Seyt Maria heeftet beste t'sal niet faelgeeren
Daerom sal ick met Christus woort nv concludeeren
Achtent swaerste ent beste deur menschen ontbonden
Betering van leuen en berou van sonden.
T'schiet wt Lieft. |
|