Noortwijck.
VVat het swaerste is, en t'beste binnen swerelts ronden
Dat deur smenschen verstant oyt is gheuonden.
Daer-om niet swaerder is, noch beter dan tgout gheuonden
God die den mensche, nae zijn beelde, heeft gheschapen
Om dat hy gheen beter ghestalt heeft connen vinnen
Noch gheschickter, als den mensch, om te gaen Rapen
Eenighe Consten, off yet anders, door smenschen sinnen
Ofte door smenschen verstandt, om wel te bekinnen
Wat het swaerste is, en t'beste, in swerelts pleyn
Dat oyt is gheuonden, niet buyten, maer binnen
Swerelts Ronden, het zy int groot, off int cleyn
Waer deur die Caert, ons is ghesonden, alghemeyn
Om dees vraghe te solueren, en maken bekent
Die daer Rapen Gheneucht, dan wy sullen certeyn
Gaen nemen onse voet, ende ons fondament
Op het fijn gout, want elcx hem daer toe went
Om dat selffde te ghecrijghen, hoort mijn vermonden
Eerst en voor al, ist swaerste, ghewicht, pertinent
En oock t'beste, van alle metalen ontbonden
Daer-om niet swaerder is, noch beter dan t'gout gheuonden.
Om t'selffde, beter te beweren, en gaen bewijsen
Dat het gout, het swaerste is, van ghewichten
Is goet om te weten, men cant niet misprijsen
Van dies hem verstaen, die wetent op te lichten
En also onderscheyden, en oock onderrichten
Oft Coper, oft ander, onsuyuer, metael // is
Tis oock t'swaerste om vinden, somen can dichten
Off moghen versieren, wantet het principael // is
Daer alle consten deur comen oft een duyts off wael // is
Dat smenschen verstandt, oyt heeft voort ghebrocht
Want sy weten, dat aent gout, goet verhael // is
Tzy die const vant letter setten, drucken, tsamen gheknocht
Off coren te malen, sayen, bouwen, hoet zy ghewrocht
Physicam, Chyrurgicam, te heelen die wonden
Na eenich const off practijck, en soumen hebben ghedocht
En waert gout, niet t'best gheweest voor siecken en ghesonden
Daer-om niet swaerder is, noch beter dan t'gout gheuonden.
| |
Wie souder willen arbeyden, oft const, ondersoecken
En waert niet om t'goudt, om te hebben, goe daghen
Off wie soude zijn hooft, gaen breken, inde boecken
Iae daer zijnder, dier lijff, en ziel, om gaen waghen
Wie souder in eenighe dinghen, hebben behaghen
En waert niet om t'gout, daert al om wert ghedaen
Want men siet, al-comender noch soo veel plaghen
So is den mensch naerstich, om t'gout te ontfaen
Den Crijschman, inden crijch, haer niet lang beraen
De Coopluyden, te lande, te water haer gheneren
De vischers, die quade zee, oock niet en versmaen
Iae, hy zy edel, off onedel, Vorsten, en Heren
Ten is anders niet, dan tgoudt, dat sy begheren
Daer-om ist, oock swaer om crijghen tallen stonden
Tis oock t'beste, alsmen hier mach verstaen en leren
Ledt doch wel op het punct, en wiltet wel doorgronden
Daer-om niet swaerder is, noch beter dan t'gout gheuonden.
Prince den oppersten Prins al van hier bouen
Die ons deur smenschen verstant, heeft laten weten
Dien moeten wy eewich dancken ende louen
En openbaer heeft, laten brenghen, al die secreten
Op Aerden, hoe datmense, souden moghen heten
Oock hoe dattet gout, hier tswaerste is, ende t'beste
Een seer schoone substancij, wiltet niet vergheten
So willen wijt, oock gaen besluyten, op t'leste
Hoe dat Godt den arck, met zijn behoorende reste
Des verbonts, heeft laten maken, tis ongheloghen
En heeftet Moyses beuolen, en oock beueste
Dat alle dinghen meest, soude werden ouertoghen
Met fijnen goude, so hy wist, en sach voor oghen
Datter niet beters, en was, binnen swerelts ronden
Daer-om segghe ick noch, ende ben niet bedroghen
So neem ick v, altesamen, tot mijn oorconden
Datter niet swaerder is, noch beter dan tgout gheuonden.
Haet is quaet.
|
|
Auteursrechtvrij