Refereynen ghepronunchieert opte intreden binnen der stede van Delft

[fol. E4v]

Monster.

Refereyn op de Uraghe,
VVat het swaertste is, en t'beste binnen swerels Ronden,
Dat deur smenschen verstant oyt is gheuonden?

Als ick by mijn seluen gae considereren
En wil ouerlegghen mit naerstich vseren
De dinghen die ter werelt deur smenschen verstant
Oyt zijn gheuonden, tbeste daer wt eligeeren
En tswaerste tgheen meest aenhangt int hanteeren
So comen my veel saecken inden sin en te hant
Die goet zijn en daer by vol swaerheyts abundant
Als gout, siluer daer tghierich hart veel van wil houwen
Oock sommigh' handtwercken, als timmeren playsant
Druckerije en bysonder het Acker bouwen
Dan als my redene vorder gaet ontfouwen
Dat ghelijck tghemoet inden mensch dan zijn lichaeme
Meerder is, en also beter oock t'achten trouwen
Tgheene tghemoet dient, dan dat tlichaem is bequaeme,
So valt my mijnder intentie meest aenghenaeme
Voor tswaerste en tbeste te houwen in eere
De lofflicke Philosophie der deuchden leere.

Philosophie die een wetenschap is reyne
Van alle hemelsch' en menschelicke dinghen pleijne
Nae der gheleerden diffinitiuelick spreecken
Een moeder der Consten, die den mensch alleyne
Subtijlick en welsprekend' maeckt nae hare seyne
Bequaem om den wilden en grammen moet te breecken
Die smenschen ghemoet formeert mit deuchdelicke treecken
Sijn leuen en werckinghe regeert ghestadich
Een Conincklicke discipline ghebleecken
Soose Apuleius beschrijft wijs en beradich
Gheuonden tot d'welspreecken en wel leuen sucadich
Sonder welck gheen stadt gheregeert oft staende mach blijuen
Die den mensch bouen al swerelts schat is versadich
Iae wie sou haren lof ten vollen maghen schrijuen
Dan ick moet Ciceronis seyt te zijn iae meere
De lofflicke Philosophie der deuchden leeren.

[fol. F1r]

 

Datse oock tswaertste ter werelt is, maeckt ons claer

 

Tspreeckwoort Platonis, Tgheen alle goede saecken lofbaer

 

Difficijl spreeckt en vol arbeydts te becomen

 

Waer wt dan nootlicken gheinfereert wort wel en waer

 

Dat tgheene tbest gheacht wort oock is meest swaer

 

Soo die, dient besocht is, wel hebben vernomen

 

Met oneyndelicken arbeyt vry sonder schromen

 

Moet hy naerstich soecken die haer vindt in vreden

 

En die haer weghen sal wandelen als den vromen

 

Niet laborieuser dan die te betreden

 

Dit gheeft ons te verstaen de Poëtelicke reden

 

Die den Musen der Consten voorstanders groot

 

Op thooghe steyle ghebercht steenrootzich beneden

 

Ghestelt heeft, daer niemant toeclimt dan met swaer moeyte bloot

 

Exempel leest van Plato en andere minioot

 

In welcken blijckt tswaerste te zijn so ick mouere

 

De lofflicke Philosophie der deuchden Leere.

 

 

 

Prince.

 

Niet beters oft lofflickers en isser oyt ontbonden

 

Dan Philosophie deur Mercurium ghevonden

 

Wiens menschelijck verstandt deur sulcke inuentie

 

Egypten vercierde ter alder eerster stonden

 

Met goude statuyten, Lyturgus oirconden

 

Lacedemonien deur dese scientie

 

Sal ons Philosophische presentie

 

Die van Athenen brachte prosperiteyt

 

Pythagoras met zijn wijse intentie

 

Den ouden Griecken gaff wettelick bescheyt

 

Plato in Arcadien, waer deur sy wijt verbreyt

 

Eenen onsterfflicken naem hebben naeghelaeten

 

Mer met wat moeyte, sweete en swaeren arbeyt

 

Weeten de bekende, donbekende cans niet vaeten

 

Dus dat tswaerste is en tbeste bouen maeten

 

Deur smenschen verstandt ghevonden ick concludere

 

De lofflicke Philosophie der deuchden Leere.