Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio N3v]
| |
Liedeken.
GHy Bataviers wilt nemen acht,
Vuyt wiens gheslachte // ghy zijt ghebracht,
BATTVS alsoo was hy gheheten,
SALANDERS broeder wel bedacht,
Den welcken placht // te wonen sacht,
Bouen Hongarien, te weten,
In twist en onvreden gheseten,
Dies ginghen dees Broeders vermeden,
Te soecken t'eylant vanden Rijn,
Dits hoort mijn // d'afcomts fijn // en moet zijn Holnederlant,
Dus bruyct verstant // sonder verheffen,
Siet waer ghy bent // accordeert jent // nae t'slants naem effen.
| |
Refereyn.
ALsmen de Cronijcken der Roomscher geesten leest,
Van haer eerste beginsel wat sy bedreuen,
Men vint dattet cloecke mannen hebben gheweest,
Stout ende onversaecht, hoochmoedigh int leuen,
Meest alle Godt-lose boeuen die haer verheuen,
En ginghen begeuen // tot orloghen en strien,
Om groten roof en beudt te crijghen beneuen,
Haer rijck te vermeren tot trots diet ginck benien,
Sochten een grooten naem, en te crijghen t'ghebien,
Maer laet ons eens besien // het volck hier te landen,
In Batavien of de Bataviers oock rien,
Nae on-eerlicke prosperiteyt t'haerder schanden,
Neen die Godt vresen hebben ander verstanden,
d'Welck hier wel zijn die duchten voor t'eewigh weynen,
Alsulcke Bataviers overtreffen d'oude Romeynen.
| |
Liedeken.Menich oude Roomsche Cronijck,
Seght autentijck // dat uyt duytsch-rijck,
Neerlanders waren d'vroomste knechten,
Snel, cloeck, wacker, lanckmoech gelijck,
Deen geen beswijck // daer van sach blijck,
Keyser OTTO GALBA,, int vechten,
Die sy dienden als een oprechten,
Waren bemint strijdt me te slechten,
By Keysers, Coninghen altijt,
Weest verblijt // doet u vlijt // die noch zijt // Bataviers vroom,
Looflick in room // wilt trimpheren,
Maer u verneert // so accordeert // ghy nae t'slants leeren,
| |
[Folio N4r]
| |
Refereyn.
Romen is na, in goede gheschicktheyt ghekeert,
Dat elck wist reden, eer ende echt t'ontfouwen,
Maer na dees regels sin moeten zijn ghenoteert,
d'Oude of d'eerste haer qualiteyt t'aenschouwen,
Deen sy niet ses hondert Dochters met cracht houwen,
Vuyt ander Lantdouwen // daermen t'bloe-om vergoot,
Haer eerste Fondateur die Roma deedt bouwen,
En sloech die niet als een moorder zijn broeder doot,
Sy sochten heerschappi, en eenen name groot,
Maer weynich also snoot // salmer hier sulc vinnen,
Dats in dit Nederland, nedericheyt is t'exploot,
Die hem selfs verheeft, verneert, Godt wil dit versinnen,
Maer die haer verneren in Godts vrees uyt minnen,
Dat zijn recht na godts wil en t'lants aert de reynen,
Alsulcke Bataviers overtreffen d'oude Romeynen.
| |
Liedeken.Des werelts vreucht is nae verdriet,
Diet wel in siet // t'sy hoet gheschiet,
Hoogh gheacht sal Godt verstoren.
Doet wel, peynst om nederheyt yet,
Soeckt geen ghebiet // maer als knecht vliet,
Denckt ick ben Batavier geboren,
Als verdreuen // maer niet verloren,
Die oyt de versmaetheyt vercoren,
Wonachtigh nederich // ende laech,
Godts behaech // dt ic jaech // en na vraech, sonder pracht al,
Sulck een die sal // na zijn met vreden,
Die verneert snel // doet godts wil wel // en na t'slants seden.
| |
Refereyn.d'Oude Romeynen met Godts kennis niet verlicht,
Die eerden op Heydenscher wijs haer Afgoden,
Dus const niet nederichs van haer worden ghesticht,
t'Vleesch wil gheen nederdrucking lien na godts geboden,
Maer die Godt heeft herboren s'vleesch lust doden,
Teghenheyt uytroden // en doen lijtsaemheyt aen,
Door den gheest des geloofs, Duc d'Alba, O snoden,
Die u niet ontvloden // wat deed ghy oock verslaen,
Al Bataviers die Godt vreesden na zijn vermaen,
Haer gaeren vermeerden t'geloof te belyden,
d'Een onthooft, d'ander gedrenckt, den derden gebraen,
Sonder daer voor met Lanci of Swaert te stryden,
By godt triumpheren sy die hoocheyt mijden,
Des Christlicke Ridders, groten metten cleynen,
Alsulcke Bataviers overtreffen d'oude Romeynen.
| |
[Folio N4v]
| |
Liedeken.Leeft als een Geestlick Batavier,
Volcht de manier // van CHRISTO fier,
Soo overtreft ghy d'ou Romeynen,
Die in hem selfs glorieert hier,
Is verdwaelt schier // door sulck bestier,
Van CHTRISTO t'hooft der Capiteynen,
Want Godt sticht zijn kerck op den cleynen,
Roept den nedrigen, en den reynen,
Van herten, ghebroocken van geest,
Hy geneest minst en meest // somen leeft // door t'geloof heel,
Wert bequaem eel // te strijen goe strijden,
Die hem verneert // doet soo God leert // na schrifts belyden.
| |
Refereyn.Prince. We u ghy Romers die in u eyghen cracht roomt,
Als Benhadad so suldy tot schande raecken,
Maer so wie hem verneert Godt vrees en denckt het coomt,
Al van zijn moghende hand dat wy smaken,
Die salt wel gelucken, want dit zijn de saecken,
Godt altijt verheffen, hem seluen houden slecht
Ons doen is ydel, Godt moet ons bequaem maecken,
Ghelijck MAVRITZ van Nassou zijn trouwen knecht,
Wat schoonder Victori crijcht hy die met Godt vecht,
Hem vreest en dient, als zijn Heer Vader met waerden,
Hoger Memori, welck Godt in zijn tijdt te recht,
Ghehoorsaem was en behoorlicke eer verclaerden,
Hoochmoet noch wraeckgiericheyt hy openbaerde,
Noch zijn Soon desgelijcx noyt in genen pleynen,
Al sulcke Bataviers overtreffen d'oude Romeynen.
| |
Liedeken.Prince. Een recht Batavische ghenoot,
Heeft een strijt groot // te strijden bloot,
Tegen die den mensch haest beclemmen,
t'Welck zijn syn eygen lusten snoot,
Sathan is doot // dies dees in sloot,
Die dickmaels mits t'vleysch bouen swemmen,
Metten den geest moet hy die betemmen,
Ontfangen door Godts ware stemmen,
Als dese strijt nu is volbrocht,
Hy wort socht // wel bedocht, en gebrocht, in Gods rijck t'loon,
Met triumph schoon // sidt ghy in waerden,
Al sulcken helt // by Godt meest gelt // als den vermaerden.
Aensiet Lieft. |
|