Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio L2r]
| |
Refereyn.
ALs ghy soud willen weten om niet te falen,
In wat daden wy bouen de Romeynen zijn voorwaer,
Ick seg in vroomheyt en ghenae om niet te dwalen,
Waer so sout ghy vromer vollick connen halen,
End' barmhartigher tegens zijn vyandt dats claer,
Men heeft het ghesien aende Spaensche Vloot seer swaer,
Ons vroomheyt vermenght met die Engelsche t'samen,
Soo dat sy in corten tijdt mosten blyuen daer,
Ende een groot deel wy ghevanghen namen,
Al waren hier de Romeynen sy souden haer schamen,
Siende ons Barmharticheyt en haer tyranny,
En saghen van so weynich volck sulcken Aramade pramen,
Die ons sochten te helpen met swaert end' coort aen d'een sy,
Waer bewesen sy oyt sulcken barmharticheyt tegen haer party,
Als wy deden aen haer, het is so ghebleecken,
Die naeckt waren cledemen, O Burgeren dese Stadt ghy
Hebtse hongerich, dorstich gelaeft, en also uyt gestreecken,
t'Huys gestiert dat sy van blyschap niet en consten spreecken,
Ick seg in vroomheyt end' in barmhartich jolijsen,
Dat ons daden bouen de Romeynen zijn te prysen.
Een Turf-schip men in Breda sach voeren bloot,
Het was het Troijaens Paert sonder eenich schromen,
Elck roerden hem wacker elck armen en schoeren boot,
Tot dat syt Casteel sonder eenige remoeren groot,
Vechtender hant hebben inghenomen,
En so sy doen met forts nae de Stadt gingen comen,
Hebben van ons goede genade vercregen,
Men hoorden van gheen geclach noch moordadich beromen,
Daernae is hy nae Steen-bergen en Hemert geteghen,
Welcke vreesden voor ons Princen daden te deghen.
Baden om genade en hy heeftse ontfangen,
Zutpheen gaf hy oock genae van onsent weghen,
En Deuenter hy eens met een storm ginck pranghen,
Soo dat sy genae songen, Delf-siel den opslach met verlanghen,
En Hulst siende ons vromicheyt, bat oock om ghenae,
Die ons Gouuerneur haer heeft ghegheuen sonder verstrangen,
En Nieumegen is oock door dwanck so ick verstae,
Comende met het hooft inden schoot, en niet te spae,
Ick seg door vroomheyt en barmharticheyt diemen hier siet rysen,
Dat ons daden bouen de Romeynen zijn te prysen.
| |
[Folio L2v]
| |
Steen-Wijck men met forts end' ghewelt dwinghen sach,
Met sonderlinghe Mijnen die wy daer deden springhen,
En Couvoorden deden wy beuen hoort mijn gewach,
Sy quamen om ghenade, daer hyer voor lach,
En hebbent ghecreghen dit syn loffelicke dinghen,
Geertruydenberch ginck hy soo vast om ringhen,
Dat hy tegen den Vyandt ginck houden t'velt,
In des vyants presentij hy de Stadt ginck dwinghen,
Hoe wel sy duysenden starcker waren van Volck getelt,
Haer Bolwerck wy innamen met ghewelt,
Onsen PRINS nam haer in ghenae en dede haer graty,
Dus den Vyant ginck ruymen seer ontstelt,
Groeningen hebben wy ghewonnen vol van Laudaty,
Ryn-berck, Alpen, Meurs, Grol, tot deser spaty,
Siende ons barmharticheyt, baden om vrede,
Maer Breefooort blyuen vol obstinaty,
Is ons Volck daer met schilt en swaert ingetreden,
Dit siende Outmarssen, Oldenseel, Lingen, Enscheden,
Die noch door ons vroomheyt en barmharticheyt souden wysen,
Dat ons daden bouen de Romeynen zijn te prysen.
Prince.
Waer heeft men oyt gesien onder de Princelicke Romeynen,
Soo veel Steden in soo corten tijdt te prospereren,
Met minder treuren oft minder weynen,
Oft minder bloet te sien storten by Soldaten en Capiteynen,
Dan wy, met vroomheyt en barmharticheyt te useeren,
Weten te brenghen den Vyant dat hy hem niet en weet te keeren,
Dus met ons vroomheyt houden wy rechtevoort uyt het landt,
Dagelicx de Spaingaerts met de Romeynen daer uyt weeren,
En haer Steden noch afwinnen wellick haer is schandt,
Nu Simuleren sy haer, siende dat wy deur de barmhartige handt,
En met vromicheyt haer Steden connen cryghen,
Presenteren sy ons barmharticheyt nemende so ons landt,
End' ons alsoo van onse vrome daden te doen swyghen,
End' nemen ons vromicheyt om ons soo te doen nyghen,
Siet haer eyghen woordt geeft ons vromicheyt en barmharticheyt lof,
Maer de Heeren Staten siende haer valsch op styghen,
Romen is wel bedroghen, haer barmharticheyt weten wy niet of,
De Romeynen en hebben geen barmharticheyt in haer hof,
Dus segh ick in vroomheyt en barmharticheyt sonder afgrysen,
Dat ons daden bouen de Romeynen zijn te prysen.
Hebt Lieft Altijdt. |
|