Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio E2r]
| |
Refereyn.
EEn Blinde en can immers gheen Oordeel gheuen,
Van t'geen hy niet en siet in s'Werelts percken,
Ofte so daer yemant stom sinde hier int leven,
Die en can niet spreken van saecken bouen schreuen,
T'is euen als een die vliegen wil sonder vlercken,
Maer om mijn soluti te verstercken,
Soo en can gheen Leerling recht Oordelen
Van zijn Leeraers leer, noch oock wel bemercken,
Dan door den Geest Godts so cant niet felen,
Alle Leeraers te proeuen, die met Godts Woort spelen,
Om recht te Oordelen t'sy goet ofte quaet,
t'Licht vande duysternisse het can niet schelen,
Den Herboren mensch die int geloue staet,
Sodanigen volgen oock des geestes raet,
Ende soecken oock wat daer bouen is alder meest,
Daerom achte ick dit voor een solutie delicaet,
Ende segghe met PAVLO vry onbevreest,
Niemant can recht oordelen, dan door den heylighen geest.
Door den Heyligen geest heeft Petrus bekent,
CHRISTVS te wesen GODTS leuendige Soon,
Want sonder den geest godts is den mensche blent,
Om dat hy zijn Ooch tot een vleesselick Oordeel went,
Want hy en verstaet niet vanden geest ydoon,
T'en baet gheen Philosophie al isset schoon,
Opinie verblint gants den mensch onherboren,
En eyghen Vernuft comt oock self in persoon.
Heeft dickmael t'quade voort goede vercoren,
So dat een recht Oordeel verde is verloren,
Volgende hier in de Phariseesse natie.
CHTISTVS was een verleyder dat most hy horen,
Metten Duyuel beseten wat grooter blamatie,
Van dese geleerde wat quader satie,
Dits immers een verkeert Oordeel geweest,
Van onsen oppersten Leeraer vol van gratie,
Daerom segh ick als voren verstaet den keest,
Niemant can recht oordelen, dan door den heylighen geest.
| |
[Folio E2v]
| |
Die dan den Geest Godts ontfangen heeft,
Can zijns Leeraers leere wel oordelen net,
Want goede kennisse onse Salicheyt daer aen kleeft,
Anders ist al verkeert oordeel wat den mensche gheeft,
s'Menschen oordeel is verde verscheyden van Godts wet,
Die van Corinthen hebben hier wel op ghelet,
Oordeelde t'woort PAVLI t'middel der Salicheyt,
Wel binnen Ierusalem met een goet opset,
Actorum int tweede wert daer uytgeleyt,
Vanden Leerlingen doort wonderlick feyt,
t'Woort der Apostelen dat haer moueerde,
Te spreken een recht oordeel, en hebben geseyt:
T'is t'recht Woort Godts t'waer tijdt wy ons bekeerde,
Want t'woort was crachtich dat sy leerde,
Ia den rechten medecijn die ons wonden geneest,
Daerom houde ick noch dese soluti in weerde,
Ende andtwoorde noch op dese feest,
Niemant can recht oordelen, dan door den heylighen geest.
Prince.
Ghy die daer siet een splinder in uws Broeders oghen,
En den Balck in u eyghen oghe en siet ghy niet,
De welcke diende eerst wel uytghetoghen,
Schuyt sulck quaet oordeel na u vermoghen,
Met GAMALIEL voorsichtich voor u siet,
Let op die van Berreen alst is gheschiet,
Dat sy haer Leer-meesters leere gauen Credentie,
Een recht oordeel hadde, daer terstont gebiet,
Ondersoeckende de Schrift met Diligentie,
Die van Athenen vol van Scientie,
Hebben PAVLI leere oock recht gelaudeert,
Oock de Ephesen met een goede Conscientie,
Zijn door t'Woort tot PAVLVM terstondt bekeert,
t'Oordeel haers Leer-meesters recht geuseert,
Verlatende DIANA dat siluere Beest,
En als goede Leerlinghen t'recht Woort Godts begheert,
Dus besluyt ick mijn regel, om datmen also leeft,
Niemant can recht oordelen, dan door den heylighen geest.
P. Tanenburch. |
|