Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio D2r]
| |
Refereyn.
SVlck eenen Leerlingh is den Leeraer aengename,
Die van zijn leere weet t'oordelen recht bequaem,
Maer CHRISTVS die doch is den rechten Leeraer soet,
Heeft weynich sulcke goed' Leer-jongeren eersame
Die hem behaghen wel, want menich t'synder blame,
Als hy slechts voert den Naem van CHRISTVS Schole goet,
Hem dunck wel dat hy is dan eenen Leerling vroet,
Al ist dat hy nochtans soo weynich is bedreuen,
Door syn onachtsaermheyt, end' overvlouwen moet,
Dat hy gheen Oordeel recht en soude connen geuen,
(Als sulcx noot dede) van syns Leeraers leer verheuen,
Want hy en acht niet op syns onderwysers raet,
Maer op dat niet also en soude moeten sneuen,
Den vromen Leerling die de leere gade slate,
Die Leeraer selue leert soo in Ioannes staet,
Dat yegelick die doet GODTS wille wel geneghen,
Recht sal oordelen of zijn leer is goedt of quaet,
Hebbende door Oodtmoet de kennisse vercreghen.
Den Leerling en sal niet Oordelen recht ghepresen,
Of hy moet hebben eerst de kenniss' uyt ghelesen,
Daer door hy selue weet of hy wel spreeckt of niet,
End' kenniss' en sal hem niet comen angheresen,
Eer dat geensins hy en cryght tot onderwysingh' yet,
Voor dat hy leersaem staet om cryghen recht t'bediet,
End' door vernedertheyt wil onderwys bevragen,
Want al die sorgeloos de leer' alsomen siet,
Cleen achten zijn altijdt door twyfel in't verzaghen,
Maer elcken Leerlingh die den leeraer met behaghen
Oodtmoedelick versoeckt om dat hy niet en weet,
Die sal hy wel van als volcomelick ghewagen,
Want hy om sulcx te doen is t'aller tydt ghereet,
End' roept tot hem elck een die is beladen breet,
Om hem verquicken snel, hier om sal wel ter deghen,
Den Leerling vande leer zijns leeraers doen bescheet,
Hebbende door Oodtmoet de kennisse vercreghen.
| |
[Folio D2v]
| |
Alsoo conden DANIEL end' IOSEPH wel verclaren,
T'recht Oordeel vande leer haers Leeraers sonder sparen,
Die van hem was geleert soo gantschelick bedeckt,
Dat geen Waer-seggers noch Geleerde daer en waren,
Die daer van wisten yet int minste t'openbaren,
Want sy en waren niet tot leersaemheyt verweckt,
Maer vol onachtsaemheyt, hoochmoedigh soo bevleckt,
Dat sy niet eens bedocht en hebben recht van binnen,
Die kennis heeft van doen, versoecken moet perfeckt
Den Leeraer dies elck een in veelheyt gheeft uyt minnen,
Waer op d'Apostels bet acht namen om gewinnen,
De kennis inde leer' end' zijn van t'lief getal,
End' als sy't niet gheheel en conden wel versinnen,
Sy hebben door Oodtmoet versocht bescheet van al,
Den Leerlingh die soo doet hier in dit aerdtsche dal,
Cryght een Nieuwen geest, dies hy door sulcken segen,
Recht van zijns Leeraers leer een Oordeel spreken sal,
Hebbende door Oodtmoet de kennisse vercreghen.
Prince.
Die clopt wort opghedaen, die soeckt die vint waerachtich,
Die vierich bidt die sal ontfanghen oock eendrachtich,
Belooft den Leeraer vast, end' hy gebenedijt,
Roept elck een die behoeft zijn hulpe sterck end' crachtich,
Hier in magh grypen moet den Leerling die voordachtich,
Oodtmoedich is geneyght te leeren t'alder tijdt,
Om kennen recht de leer, end' daer door zijn bevrijt,
Als veel Propheten valsch voortcomen onmanierich,
Daer hy door wort beproeft, want soo hy dan met vlijt
T'recht Oordeel weet te doen, soo sal hy goederthierich
Daer med' haer wederstaen, gelijck als MOYSIS vierich
Ghedaen heeft, CHORACH met al zijnen anhangh groot,
En t'volck daer door ghetoont de dolinghe dangierich,
ELIAS ded' oock soo als Baals Priesters snoot
Hem teghen stonden stout, end' hielp hem uyt den noot,
Door een recht Oordeel goet, dat oock in alle weghen,
Den Leerling vande leer zijns leeraers doen sal bloot,
Hebbende door Oodtmoet de kennisse vercreghen.
In liefden getrouwe. Deursiet den grondt. |
|