ren apostelen, ende ghinc daer na int hoofken bidden sinen hemelschen vader voor onse salicheyt. Ende Iudas quam met veel volcx int hoofken, ende seyde henlieden, den ic cusse dat is de man hout hem vast. Ende Ihesus quam hen teghen ende vraechde hen lieden, wien suecti, si antwoorden Ihesum van Nazareth. Ihesus seyde ic bent. Ende terstont vielen si achterwaerts ouer ter eerden Ende de here lietse doe weder opstaen en seyde Ist dat ghi mi suect laet dees gaen. Doe ghinc Iudas stoutelijck tot Iesum ende custen Doe seyde Ihesus Vrient waer toe sidi comen dat ghi leuert den sonde ders menschen met een cusse. Doe vinghen si Ihesum ende bonden hem ende brochten hem eerst voor Annam. doe voor Caypham. Pilatum, ende Herodem. Ende Iudas ghinc alomme metten knechten ende sach dat die suete Ihesus so iammerlijc getracteert wert, so wast hem leet dat hi hem geleuert had ende hi ginc totten ouersten ende princen der priesteren, ende seyde Ic heb gesondicht dat ic verraden hebbe dat onnosel rechtuaerdich bloot, doen seyden si, Siet wat ghi gedaen hebt, daer en leyt ons niet aen. Doen wert hi mistroostich ende werp tgelt voor haer voeten ende hi ghinck van daer ende hi verhinck hem seluen, ende barst int middel. Siet doch wat onsaligher eynde had Iudas na onsalighe quade wercken.
Auteursrechtvrij
