Der IX quaesten

¶Hoe Iudas viel op sijn knien voor Cristum Iesum ende badt hem om verghiffenis gracie ende barmherticheyt van sinen sonden

[fol. H1r]

Doe Iudas nv alle idnghen wiste hoe dattet met hem ghelegen was, so nam hi oorlof an sijn moeder ende ghinck terstont tot onsen heere ende salichmaker Cristum Ihesum, want hy had ghehoort dattet was een heylich propheet, ende vergaf den zondaers haer sonden. Als nv Iudas bi Ihesum quam so viel hy voor hem op sijn knijen, ende badt seer ootmoedelijc met heeten tranen om sijn gracie, barmherticheit, ende verghiffenis van sinen sonden, ende terstont vergaf hem die heer sijn sonden. Ende doe badt Iudas Ihesum dat hi hem ontfangen wilde, ende laten hem sijn een van sinen discipulen Ende ons salichmaker aensiende sijn groot berouwe, ende sijn ootmoedich bidden nam hem in sinen apostel, ende te voren waren daer .xi. apostolen. ende met Iudam wasser doe .xii. Ende doe gaf hi Iudam de officie ende maecte hem dispensier, ontfanger, ende wtgheuer. ende hy cocht al dat die heere behoefde met sinen iongheren. Ende al dat den sueten Ihesum ghegeuen wert dat ontfinck Iudas ende altijt behielt hi dat thiende deel voor hem seluen.