Hier teghen verwecte die duuel in dien tijden den ongheleerden valschen propheet Machamet, die een anbeder der afgoden was, ende eerde die afgoddinne Venus, ende want den vrijdach is gheheten na Venus in latijn, daerom is den vrijdach der Sarasinen ende Machameten sondach, ofte heylich dach. Dese machamet bedroech ontallijke veel menschen met sijn luegenen ende boevrijen. Ende al die vrouwen ende mannen van Arabien meenden, dat alle die geboden die hi den volcke gaf dat hi die ontfangen hadde vanden archangel Gabriel
¶ In den tijden wasser een clerck te rome die daer een beneficie begheerde, daer hi niet toecomen en mochte, dyes hi gram wert, ende vertrack ouer zee ende hi quam bi Machamet, die hem leerde veel scrifturen, ende hi geloofde hem groot te maken onder dat volck. Ende die clerck had een witte duue gheleert so wanneer dat machamet predicte so quam de duue op machamets schouweren ghevloegen, ende stack haren beck in sijn oore, ende adt daer terwe wt gelijc si ghewoen was te doen. dan seyde hi den volcke dattet die heylige gheest was de hem instorte dat woort dat hi hen lieden seyde. Ende daer was ooc een os dye wt sinen handen plach te eten, ende als hi den volcke nieuwe gheboden wilde geuen, so screef hi die in een tafel ende bant die den osse an den hals, ende als de osse dan machamet hoorde spreken, so quam hi ghelopen door al dat volc ende brocht die voor sinen meester, dan seyde machamet dat die gheboden van god gesonden waren. Oock wasser een Sergius gheheten die leerde machamet dat oude ende nieuwe testament. Ende om dat de kersten bidden oostwaert, ende die Ioden westwaert, so geboodt
Auteursrechtvrij
