Der IX quaesten
(1528)–Anoniem IX quaesten, Der–![]() | |
[Folio E3v]
| |
gaf hi haer ooc grote gauen, soe dat si hem consenteerde ende hi quam bi haer slapen. So quam sijn vrouwe Cadiga op een tijt daer hi sliep, ende si vant hem ligghen bi der maecht te bedde, des si gram wert, ende seyde. Is dyt een werck van eenen propheet behoert v dit te doen Doe sey machemet beschaemt zijnde ende swoer dattet niet meer gheschien soude, dyes si doe te vreden was. Daer na vantse hem weder liggen bider kersten maecht dies Cadiga seer gram wert, ende sey dat hy meyneedich ende versworen was. Doe sey machamet dat hem god beuolen had, ende met hem gedispenseert, daer af getuygen waren die archangelen Michael ende Gabriel, dat hi maechden ende vrouwen mochte nemen die hy wilde, om datter grote propheten af comen souden hoe wel dat hi noyt maer een dochter en had die nochtans geen prophetesse en was. Somen ooc leest van hem dat hi op een tijt beminde die schone vrouwe zanabab, die huysvrou van Sed. ende machamet quam bi Sed ende seyde. O Sed die heere ghebiedt v dat ghi v wijf verlaten sult, ende als Sed dwijf verlaten had so namse machamet tot hem. Ende daerom consenteert hi dat men hebben mach .iiii. getroude huysvrouwen. ende so veel concubinen alsmen voeden can. Machamet seyt dat meyneedicheyt geen sonde en is, mer stelt daer alleen penitencie voor. So wanneer yemant meyneedich is die sal .x. arme menschen spijsen, oft eenen geuangen verlossen, ende dye dat niet en vermach sal .iii. dagen vasten. ende hier wt comt dat veel heyden niet en vresen te versweeren, nochtans hebben sy een maniere van sweeren die si niet gheern en breken, sonderlinghe als si sweeren op haren tant. Hi stelt ooc datmen weel stelen | |
[Folio E4r]
| |
en rouen mach, op datmen daer af dat vijfste deele god gaue Ende machamet hielt selfs dieuen, en straetrouers die de cooplieden afsetten ende brocheen hem den roof Ende wie teghen sijn valsche leeringe was den dede hi doden. Daer was een oudt Iode dye sijn leeringhe versmade, den liet hi vermoorden in sijn bedde. Dese machamet stelt niet datmen eenige restitucye doen sal van eenighen roof, tis ooc der sarasinen maniere niet. Maer tis hen lieden ghenoech voor alle misdaden te segghen Ten is gheen god dan god, en sijn bode machamet. Ende om dat Ismahel daer dye Sarasinen afcomen sijn wert van sinen vader Abraham besneden tot sinen .xiii. iaren. so stelt hy ooc die besnijdenisse ten .xiii. iaren. Machamet stelt datmen bouen .iiii. ghetroude wijfs niet hebben en mach, mer men machse driewerf repudieren ende wech iagen ende nemense altoos woder, of nemen ander vrouwen in haer stede. ![]() ¶ Machamet stelt oock in sijnder wet, so wie misdoet met een ander ghehuwede vrouwe die salmen beide doot steenighen. misdoet yemant met een onghehuwede vrouwe. den gheeftmen lxxx. slaghen, misdoetmen noch daer mede so verliest hi sijn een hant. misdoet hi noch met een ongehuwede vrouwe, so verliest hi eenen voet. Machamet stelt oock datmen huwen mach an zijn gheslachte, op dattet bloet niet en soude vergaen. ende die vrientschap te meerder soude blijuen. | |
[Folio E4v]
| |
Desen machamet segghen si te zijn een propheet, nochtans en dede hi noyt mirakelen, want dat volck gelouet lichtelijck dat na de wellust des vleesch is. want hi die scriftueren ooc stelt tot genuechten van spijse ende van drancke na dit leuen. |
|