Der IX quaesten

[fol. D4v]

Hoe Albanus wert schipbrueckich, ende lande in Galissien. ende quam biden coninc. Vespasianus

Sommige scriuen als Pilatus des keysers brieuen ontfangen had int iaer ons heeren .xxxvii. so sende hi ouer eenen eedelen man Albanus geheeten om hem te verontschuldigen biden keyser. Ende hi quam met eenen scepe int landt van Galissien daer sy schipbrueckich worden. So was daer een recht, die schipbrueckich is ende te lande quam, die most eygen zijn totten here ders lants daer hi an quam. So wert Albanus gebracht voor, den coninc. Vespasianus. die hem vraechde van waer hi was. Albanus seyde Ic ben van Iherusalem. So sidi seyde Vespasianus van een landt daer wijse meesters woenen, al dus suldi mi gesont maken, want hi had een plage, dat leuende wespen vloegen wt ende in zijn nase, dat hijt selue niet keeren en mochte. noch gheen meester en conde hem genesen noch helpen van sijnder plaghe

[fol. E1r]

Doe seyde Albanus Ic en can v niet genesen, maer hi die blinden siende maect, die doden verwect, dye can v ghenesen, wildi an hem gelouen. Doe seyde Vespasianus wie is dat, Albanus seyde dat is Ihesus Cristus den die Ioden gedoot hebben, gelooft in hem, ende ghi sult ghenesen. Doe seyde vespasianus Ic geloue dat hy die doden verwect mach hi mi ghenesen. Terstont hi wert ghesont, ende die wespen vielen wt sijnder nasen. Doe seyde vespasianus Nv gelouick sekerlijc dat hi was ende is die sone gods Ic sal sijn doot wreken, ende daer toe sal ic mi schicken. Daer na track hy voor Iherusalem met groter heyrcracht ende beleyde die stadt op eenen paesdach als al dat volc vanden lande daer binnen was om haer hootghelt te betalen, so datter menich duysent van honger sterf. want een muys werter vercocht voor .C. gouden penningen. Ende binnen desen belegge so sterf die Keyser van Rome Tiberius Ende Vespasianus wert Keyser ghecoren, waerom dat hy terstont vertrack na Rome, ende hi liet sinen sone Tytus int belegghe als heere ende capiteyn vanden heyre. Ende die van binnen waren so belast dat de moeder at haer kint. Men vant niet in al die stadt noch catte hont, ratte, noch muys, ten was al gheten. Ende si leeden van binnen so groten hongher dat sy die poorten open deden ende lieten hem dootslaen van haren vianden, so dat daer doot bleuen inder stadt .xi.C.M. menschen. ende vii.m. wertter vercocht. ende men gaf .xxx. ioden om eenen penninck. Aldus onsalichlijc sterf Pylatus ende so veel Ioden, om dat si den onnoselen Ihesum so deerlijc bitterlijc, onschuldichlic, gedoot hadden. welcke doot ende bitter passie moet zijn tonser sielen salicheyt. Amen