Hoe die keyser sende den heere Volutianum tot Iherusalem.
Als die keyser dit verstaen hadde, so seyde totten eedelen man volucianum Bereyt v, ende besorcht v van ghelde, ende reyst terstont ouer zee tot Iherusalem ende segt pylato dat hy mi sende den groten meester Ihesum Christum die mi mach ghesont maken Ende doe vertrack volutianus ende quam met goeder auentueren te Iherusalem tot pilatum ende seyde dat hem de keyser ontboden hadde, dat hi hem senden soude den groten propheet Cristum Ihesum. van welcken woorden Pylatus veruaert was en badt den ridder Volucianum dat hi hem .xiiii. dagen dach wilde gheuen, om den meester Ihesum te soecken. Binnen desen tijden geuielt dat Volucianus sprack met die weerdighe vrouwe Veronica, dye ons heeren heymelijcke discipelersse was Ende hi vraechde haer waer hi mochte vinden den groten meester Ihesum. Doe seyde veronica Ihesus was mijn alderliefste meester, die is van Pylatus ende den ioden gedoot. Ende inden tijden als hi hier was prekende ende in veel ander plaetsen, so en mocht ic hem tot allen tijden na mijnen wille niet sien, so wildick laten maken een beelde na sijn gelijckenisse in eenen doeck, ende als ic wilde gaen totten schylder so gemoete mi mijn minlijc meester Ihesus, ende hi nam den doeck ende dructe an zijn aensicht, ende daer bleef in staen de gelijckenis des aensichts van mijnen lieuen meester Iesum. Ende dat selue beelde heb ic noch bi mi, wilt dijn heer an hem gelouen hi sal gesont werden. Doe nam volucyanus veronicam met hem ende brochtse voor den keyser, ende si bracht met haer dat beelde inden doeck
Auteursrechtvrij
