Der IX quaesten
(1528)–Anoniem IX quaesten, Der–![]() | |
[Folio D1r]
| |
dit de coninc. hoorde, so was hi seer bedroeft van sinen sone ende was seer gram ende toornich op Pylatum. Doe vraechde die coninc. raet sinen heeren, die hem alle seyden dat Pylatus dlijf verbuert hadde. Doe sende hi Pylatum tot Rome te ghijsele voor den thijns den hy den Romeynen schuldich was. Daer was ooc te ghijsele ghestelt des conincs sone van vrancrijck. Ende Pylatus ende hi waren te samen grote ghesellen So geuielt op een tijt dat si woorden ghecregen tusschen hen beyden so dat si worden vechtende, maer Pylatus behielt de ouerhant, ende hi stack des conincs van vrancrijck soen doot. Doe waren die Romeynen bedroeft, ende wisten niet wat si met Pylatum maken souden, want si en dorsten hem niet doden om sijns vaders wille. Soe was daer een landt ouer zee geheeten Pontus, daer quaet straf ongevreest volck woende, die haer ouersten ende rechters al plaghen doot te slaen, so dat daer geen regeerder noch rechter int landt en was. so senden sy Pylatum daerwaerts, ende stelden hem daer voor eenen rechtere Als hi daer een wijle tijts geweest had, so leefde hi so wel metten volck met subtijlheyt en schonen woorden dat si hem al beminden, ende waren hem onderdanich ende subiect, ende van dien lande was hi genoemt Pontius pylatus. Als coninc. Herodes verhoorde dat hi dat landt van Pontem so onder subiectie gebracht hadde, so stelde hi hem bi de macht des Keysers een arbiter ende rechter in die stadt van Iherusalem ouer die Ioden. Daer nae als hi nv rechter was so versaemdy eenen groten schat ende vertrack dair met ouer zee byden keyser van Rome ende hi begaefde hem met groten ghelde, van hem begheerende dat hi hem verleenen wylde dat landt te besitten | |
[Folio D1v]
| |
te leene dat hemHerodes beuolen had, waerom dat Herodes ende Pylatus worden vianden totter tijt toe dat Christus Ihesum in sijn passie ende bittere lijden was so dat pilatus doe sende Ihesum Chrystum tot herodem ende doe worden si wederom goede vriendenEnde na dat Pylatus Ihesum gedoot hadde met onrecht ende van vresen om te verliesen sijn officie. So gheuielt dat keyser Tiberius gecreech sulcken siecte en passie dat gheen meester ter werelt en conde hem ghenesen. Doe wert den keyser geseyt hoe te Ihrlem was een meester gheheten Ihesus Christus die alle siecten genesen conde met eenen woorde. maer die keyser wiste niet dat hy doot ende ghecruyst was. |
|