Der IX quaesten

Hoe Pylatus brieuen ontfinck vanden bode des Keysers Tiberij, dat hi te Rome soude comen biden Keyser

[fol. D3r]

Als de keyser Tiberius al die dinghen gehoort hadde van Voluciano, so wert hi seer verstoort ende gram op Pylatum, ende ontboodt hem met brieuen dat hi by hem soude comen te Rome sonder eenich lanck vertrecken. Doe wilde Pylatus hem bevrijen van allen arghe, so nam hi den rock ons heeren, den de weerde moeder maria ghemaect ende ghebreyt hadde haren sone Cristum Ihesum die met hem op wies. Doe quam Pylatus van ouer zee tot Rome biden keyser Tiberio, mer hi had ons heeren rock onder zijn ander clederen an ghetrocken. Al wast dat die keyser Pylatus doot hadde gesworen, nochtans als hi hem sach so ontfinck hy hem lieflijc, des si hem al verwonderde die dat sagen. Ende na veel reden die si tsamen hadden so nam pylatus oorlof aen den keyser ende ghinc in zijn herberge Terstont als pilatus wech was so wert die keyser weder so gram op hem dat hy hem wel metten tanden had willen verschueren. ende deden weder halen. ende terstont als hi hem sach was die gramscap wech ende hi ontfinck hem weder minlijc, dat hem allen wonder gaf. ende dat gebuerde so dicwijls. Ten lesten wert den keyser geseyt dat hi aen had den rock des groten meesters Ihesum, ende door die cracht wert v benomen v gramscap op pilatum. Doe wert pilato den rock Ihesum wtgetrocken, ende doe bleef die gramscap des keisers, ende hi dede pilatum vanghen, ende hi ghinck te rade met wat doot hi hem soude doen steruen. Dat vernam pilatus ende nam doe zijn eygen mes ende dode hem seluen. Doe wert hi inden Tyber gheworpen met eenen grooten steen anden hals. Doe maecten daer die duuelen so groten tempeeste dat hi weder wten Tiber ghetrocken wert, ende wert geworpen in een water tusschen twee bergen dair hem

[fol. D3v]

die duuelen tot noch toe pijnigen. Ende zommige seggen alsmen in dat water werpt met eenen steen, dan isser sulcken misbaer al sou de werelt vergaen.

¶Eusebius scrijft van pilatum. Int iaer ons heren .xxxvi. inden tijden vanden Tiberius als hi .xxi. iaer keyser had geweest so had pilatus Tiberio eenen brief gescreuen vander leringe christus. ende thoonde den brief voort den Senatoren. om dat si ooc die heylicheyt annemen souden. want als Rychardus seyt Het was een gewoente onder de romeynen, dat alle de opperste dye gestelt waren in ander landen die screuen ouer den keyser, ende senatoren alsser eenige nieuwicheden geschieden. so dede pilatus ooc Ende den brief van pilatus was dit. Ic pontius pilatus den keyser Claudio Tiberio ootmoedige saluyt. Cortelinge heb ic geproeft dat die Ioden hebben hen seluen en haer nacomelinge gebracht in groten last ende verganc, wan haren vaderen was gelooft dat haren god hem gezonden sou werden door een heylige maecht, dye haer coninc. van rechts wegen soude geheten worden. Dese is gezonden in Iudea nv in mijnen tijden Ende als hen die ioden gesien hebben dat hi die de blinden verlichte, die lazersche reynichde, die gichtige genas die doden verwecte, ende geboodt den winden, ende met drogen voeten wandelde hi op die zee, en dede so veel ander merakelen, dattet gemeyn ioetsche volc hem sey te zijn die sone gods, so gecregen de princen der priesteren groten haet op hem, ende hebben hem in mijnen handen geleuert, ende hebben hem met lueghenen beschuldicht ende seyden dat hi was een touenaer, ende die tegen haer wet dede. So hebbic tot haren wille hem gheleuert gegheesselt, ende si hebben hem ghecruyst, ende sy hebben

[fol. D4r]

wachters gestelt an zijn graf, ende als mijn ruyters dat graf aldus bewaerden, so verrees hi vander doot an den derden dach. Doe waren de Ioden met valscheyt beuangen ende gauen den wachters veel gelts om te swigen, mer souden seggen dat zijn discipulen dlichaem gestolen hadden, mer conden niet swigen datter geschiet was, mer seyden dat hi verresen was, ende dat si een visioen der engelen gesien hadden ende dat si gelt vanden ioden ontfangen hadden Ende dit heb ic gescreuen dat men niet anders gelouen sal, noch der ioden luegenen. So Richardus seyt. Tiberius nam den brief ende ginc met groter begeerten totten senatoren, begeerende datmen den god christus soude ontfangen, mer si en wildent niet doen. ¶Comestor. Na dit wert pilatus geaccuseert voor den keyser, als van die doot der onnosel kinderkens, ende dat hi dat ghelt ders tempels wten stock genomen had, ende sinen wille daer met gedaen. Daerom stelde hem die keyser ballinck in een eylant bi Lyons daer hi gheboren was, dat hi daer steruen soude in een schande van al sinen vrienden.