Pseudo-Bonaventura-Ludolfiaanse leven van Jesus

Een goet ghebet

Om dese ende om alle saken die wij hier goedertier\lic

[fol. L259,194v]

gheloven van dij, so spreken wij dij, Heere Ihesu Criste, loff, danc ende ere. Ende al is die lof onwaerdich die wij dij spreken mogen tjegens dat dij betaemt ende du verdient hebste overmits alle dese voersproken dingen, so bidden wij di nochtan begherentlic, dat du dij selven dinen Vader offerste in enen weerdighen love, voir alle die ghene die inden hemel ende inder eerden ende inden vaghevier sijn, in allen dien dat du bekenneste dat der heiligher Drievoudicheit lof ende ere in gelegen is, op dattet wesen moet voer den lof ende danc die dij alle creaturen sculdich sijn voer alle dat goet dattu hem ghedaen hebste ende in waerachtighe beteringhe onser alre sonden, die ghedaen sijn van aenbeginne der werlt, ende in volcomenre betalinge alles goets dat wij ye versumet hebben te doen ende in vervullinge der verdienten alre saliger menschen ende der gracien alre gherechtiger menschen, in beteringe alle der dingen die voerseit sijn, in verlossinghe alle der zielen die inden vaghevier sijn, ende in verlichtinghe ende tot behoeften der sielen ende der lichamen alle der menschen. Amen.

Ende want ic dit boec in Duutsch makede ende leider onbekent bin ende lichte\liken

[fol. L259,195r]

mit enen hoefde die dingen bestae, die mi namaels rouwen, want het mi dicke berouwede, dat ic des werkes bestaen hadde, overmits dat ick dat boec ongerecht vant, daer icket uut makede ende den sin oec zwaerre vant dan ict ghewaent hadde, also dat ick dicke den sinne die ic niet wel vinden en conste, vermaken moste, daer omme bidde ic allen den genen die hier in lesen sullen, geleerde of ongeleerde, dat sij mi niet lichtelic en begripen, ende off ic erghent vanden rechten sinne gedwaelt hebbe - des ic niet en hope - dat ment verbeteren ende corrigieren wille, want ic altoes staen wille tot correctien mijnre beter. Bidt voer mi, die hier in lesen sullen, wantet mi suer gheworden is. God sij geloeft. Amen.

Here God, almachtich Vader, Scepper hemelrijcs ende eertrijcs, du Here, beroert mit vaderliker ontfermherticheit, seindste dijnen uutvercoren een geboren Sone inder werlt onse vleisch aen te nemen, op dat hij overmits die pine sijns bitteren dodes verlossen soude den menscheliken geslachte dat verloren was uut den bande des bosen viants ende uutten scoet der wreder hellen overmits dat cruce, die nage\len,

[fol. L259,195v]

die crone, die scerpe gheesselen ende dat speer. Hier om verleen ons dat die ses dusent ende hondert ende ses ende tsestich wonden die in sinen heiligen lichame geslagen waren mit desen wapenen voerseit ende die vloede des roden bloedes die uut sinen wonden liepen, moeten in onser herten wesen overmits gracie ende inlichtinge des Heyligen Gheests ons levens een bescerminge in onsen eynde, verbeteringe onser werken ende gedachten, berespinge onser woerden ende seden ende verlatenisse alle onser sonden. Amen.]