Pseudo-Bonaventura-Ludolfiaanse leven van Jesus

Hoe hi Sinte Pieter openbaerde. Dat .xliij. capittel

Als doe Magdalena ende hoer ghesellinnen te huus quamen ende den jongheren vertelden dat onse Heer verresen ware, Petrus wart droeve, dat hi onsen Heer niet ghesien en hadde ende van groter minnen en mochte hi niet rusten, tot dat hi hem ghesien hadde, ende ghinc en wech alleen vanden anderen totten grave wart ende en wiste niet, waer hi hem anders soeken mochte. Ende als hi aldus ghinc, openbaerde hem onse Heer. Altehants viel Petrus neder totter aerden ende bat ghenade van dat hi hem ghelaten hadde ende also dicke

[fol. 175v]

ghelochent. Ende onse Heer vergaf hem sijn sonden ende seide hem, dat hi sijn broeders stichten soude. Si stonden te gader ende spraken mit groter bliscappen onderlinghe ende hadden enen bliden Paesschen.

Petrus, als hi die benediccie van onsen Heer ontfanghen hadde, ghinc weder tot Onser Vrouwen ende totten discipulen ende vertelde hem alle dese dijnghe ende was daer na in allen dijnghen onsen Heer seer ghetrouwe.