Pseudo-Bonaventura-Ludolfiaanse leven van Jesus
(1980)–Anoniem pseudo-Bonaventura-Ludolfiaanse leven van Jesus–
Auteursrechtelijk beschermd
[Folio 43r]
| |
dach quam ghelijc alst inder wijt gheset was, ghinc Onse Vrouwe uut mit horen kinde Jhesu ende Joseph, ende ghinghen van Bethlehem tot Jherusalem dat vijf milen was van een, op dat si hem den Heer offeren souden. Ganc du mit hem ende help hem dat kint Jhesum draghen. Doe brochten si hem totten tempel, den Heer des tempels. Ende als si quamen inden tempel, coften si twe tortelduven of twe jonghen van slechten duven, op dat sise offeren souden voer hem ghelike als men plach te doen voer die armen. Ende want si seer arm waren, so is bet te vermoeden, dat si offerden twe jonghe duven, want mense lichteliker ende om min ghelts crighet, ende daer om worden si gheset inder wit in der lester stat. Ende die ewangeliste swighet vanden lam, want dat een offerhande der riker was. Ende die gherechtighe Symeon quam inden gheest inden tempel, op dat hi sien mochte Cristum den Here, eer hi storve also als hi die antwoerde Gods ontfanghen hadde. Ende als hi mit haesten quam ende onsen Heer sach, bekende hi hem inden gheest, ende hem haestende boghede hi sijn knien ende beden aen twisschen die armen sijnre moeder. Ende die moeder, bekennende den wille hoers kints, gaf\fen | |
[Folio 43r]
| |
Symeon. Ende Symeon ontfenc dat kint blidelic in sinen armen ende stont op ende benedide Gode ende seide: "Nu laet, Heer, dinen knecht na dinen woerden in vreden", ende prophetierde vander passien ons Heren, sprekende tot Marien: "Dijn siel sel een swaert doer gaen", dat is sijn passie. Ende Anna die prophetissa quam oec al daer ende aenbede dat kint ende sprac vanden kinde allen den ghenen die verwachtende waren die verlossinghe van Israhel. Die moeder Maria verwonderde hoer van desen saken, die si sach gheschien ende onthilt alle dese dijnghe in hoer herten. Daer na nam die moeder dat kint weder, ende ghinghen totten outaer een processie makende, daer die processie bi beteykent is, die huden die Heilighe Kerke al die werelt doer begaet. Die twie eersaem ouden Joseph ende Symeon ghinghen voer mit groter bliscap. Die moeder Maria volghede, hoer kint Jhesum, den coninc, draghende. Ende mit hoer so ghinc ter siden Anna, mit groter waerdicheden hoer verblidende ende met onsprekeliker bliscap Gode lovende. Van desen luttel luden, mar die harde groet waren, so is dese processie ghemaket, onder wilken is van allen manieren der menschen, want | |
[Folio 44r]
| |
onder hem waren man ende wive, out ende jonc, magheden ende weduwen. Ende als si totten outaer quamen, die moeder mit groter waerdicheit boghede hoer knien ende offerde horen lieven soen Gode sinen Vader opten outaer. O wat offerhande was dat! Nye en was deser ghelike ghesien van beghinne der werelt! Die priesters des tempels worden daer gheroepen ende die Heer alder werelt wort doe ghelost ghelijc enen knecht mit vijf silveren penninghen. Ende als Joseph die penninghen hadde betaelt, nam die moeder hoer kint blidelike weder, ende nam oec van Joseph die voerseide duven ende boghede hoer knien ende offerdese Gode den Vader op den outaer. Daer na die maghet Maria mit horen kinde Jhesu ende Joseph ghinghen van Jherusalem ende wouden weder keeren tot Nazareth. Ganc du mit hoer ende help haer dat kint Jhesum draghen. Ende wilstu in desen voerseiden capittel gheleert sijn van oetmoedicheden ende van armoeden, merct sijn offerhande ende waer mede hi ghelosset wart ende hoe hi der wit onderdanich was, ende lichtelijc so machstuut vinden. |
|