Het prieel der gheestelicker melodiie

[p. 180]

Voor de Maechden:

Op de wijse: Een Seraphinsche tonghe.

AEnhoort wat ick v singhe
O Maechdelijck iuweel,
Die schoonheyt sonderlinghe
Van ‘themelsche prieel:
Om mede te verwecken,
V hert’ en uwen moet,
V sinnekens te trecken
Naer Iesus liefde soet.

Om, etc.

Wat zijn doch v klaer ooghen

In d’aensicht schoon gheprent,
En ‘tgracieus vertooghen
Van al v leden ient:
Och niet dan stof der aerden,
Verlaet v daer op niet:
V lichaem kleyn van weerden
Sal drooghen als een riet.

Och, etc.

Spieghelt v aen die Roose,

Als sy ontloken staet,
Sy staet een kleyne poose,
Haer schoonheyt haest vergaet:
Soo sullen oock verdwijnen
Dijn wancxkens door de doot,
Die ghy hebt met veel pijnen
Ghehouden klaer en root.

Soo, etc.

Maer is v siel van binnen

Ende dijns herten gront

[p. 181]

 

Met hemelsch vierich minnen

 

Seer lieffelijck deur-wont:

 

Ghy sult hier dus verweruen

 

Godts graci’ met ootmoet,

 

Hier naermaels oock be-eruen

 

Godts rijck’ en d’eeuwich goet.

 

Ghy, etc.

 

Gheeft gheensins v ghedachten

 

Tot een liedt heretijck,

 

Oft een vol ydel klachten,

 

‘Twerelts ianckers ghelijck:

 

Maer singht een liedt met v vreuchden,

 

En lieffelijck accoort,

 

Beweghende tot deuchden,

 

Volghende Christus woort,

 

Maer, etc.

 

Christus sluyt uyt zijn percken

 

De dwase, die hier meest

 

En eerst te toyen mercken

 

Haer lichaem, maer den gheest

 

In veel ydel behaghen

 

Laten van deuchden bloot,

 

Sy sullen ’t noch beklaghen

 

Och inden laetsten noot.

 

In, etc.

 

Die hier mint een verblijden

 

In leuen heylichlick,

 

En in zijn ionghe tijden

 

Maeckt daer van oock sijn stick,

 

Om Godt eeren en louen

 

Met een herte verdult,

 

Die sal krijghen hier bouen

 

Een kroone schoon’ vergult.

 

Om, etc.

[p. 182]

 

Soo dan ghy maechden reene

 

Sluyt dit in’t herte vast,

 

Waer dat ghy zijt alleene

 

(Ten is toch gheen swaer last)

 

Verciert soo v lichame,

 

Brenght uwen tijdt soo uyt,

 

Dat ghy meucht zijn bequaeme

 

Om te zijn Iesus bruyt.

 

Verciert, etc.