Het prieel der gheestelicker melodiie

[p. 94]

☞ Van het Hoochweerdich allerheylichste Sacrament des Autaers.

Op de wijse: Och Amsterdam ghy doet my pijn.

CHriste warachtich Pellicaen,
Een Pellicaen ghepresen
Ons vlees hebt ghy ghenomen aen,
Ghy wild’ ons broeder wesen:
Ghy hebt v borst open ghedaen,
V bloet hebt ghy uyt laten gaen,
Om ons al te ghenesen.

Ghy, etc.

Ghy zijt voorwaer dat eeuwich broot,

Fonteyn van d’eeuwich leuen:
Al zijn wy naer de siele doot,
Door v soo wordt verdreuen
Alle ghebreck, en alle noot:
Die v ontfanght, al is hy bloot,
Rijckdom wort hem ghegheuen.

Alle, etc.

O soeten Heer’, o Vader goet,

O Heere der Heyr krachten,
Ghy komt betalen Adams boet,
Verlossen all’ gheslachten:
Maer Heer’ hoe schinckt ghy ouervloet,
V precieus en dierbaer bloet!
Och laet ons dat groot achten.

Maer, etc.

T’is een warachtich Sacrament,

Dat Iesus self instelde,
Eer dat begost sijn groot torment,
In’t klaer hy dat vertelde,

[p. 95]

 

Dit is een spijs seer excellent,

 

Neemt nut mijn lichaem ongheschent,

 

Aldus hy dat bevelde.

 

Dit is, etc.

 

O Iesu zijt ghebenedijt,

 

Dat door vijf woorden krachtich,

 

Een suyuer broot sonder respijt

 

Wort v persoon waerachtichtich:

 

Ketters die ongheloouich zijt

 

Weest toch ghedachtich t’allen tijdt,

 

Dat Godts woort is almachtich.

 

Ketters, etc.

L. de Q. Peyst om d’ure.