Het prieel der gheestelicker melodiie


☞ Een ander, op de wijse:Den lustelijcke Mey, &c. LOoft al Maria die reyn suyuer ieucht, Moeder en Maecht vol trouwen, Vry sinder rauwen, Ghebenedijt is sy vol goeder deucht, Iae bouen alle vrauwen, Deur s’Gheests bedauwen: Wt haer is ons gheboren soet, Iesus onsen peysmaker goet, Dat is Godts Soon verkoren, Die ons was toe ghesworen, Tot peys gheboren. Wt, etc. Te recht moet ghy Iesu wel zijn bemint, Want ghy quaemt ons ter baten, Wt karitaten, Den mensche liep, als een verloren kint, Verwoest, verwilt, verlaten,
[pagina 93]
De helsche straten: Maer Iesus beterd’ onsen val, Dus looft Iesum ghy menschen al, Met sijn Moeder vol eeren, Sy bringhen uyt verseeren Die toe hun keeren. Maer, etc. Al was ons hemels Vader seer ghestoort Op d’menschelick gheslachte, Quaet van ghedachte. Godts eeuwich Sone heeft ghemaeckt accoort, Hoorende ‘smenschen klachte, By dagh’ en nachte: Hy heeft benomen s’doots ghewelt, Peys tusschen Godt heeft hy ghestelt En sathans macht vertreden: Dus leeft nu elck in vreden Peyslijck van seden. Hy, etc. Wie hoorde oyt van een liefde soo groot: Daerom groot is den name, Groot is sijn fame: Want onser sielen doot heeft hy ghedoot, En ons bevrijdt van blame: Dus nu bequame Singht hem nieu lof met blijder stem, Verblijt nu al t’samen in hem, Wilt hem liefde betooghen, En laet nu druck verdrooghen, Peys is voor ooghen. Singht, etc. Seer by erghet al.