Het prieel der gheestelicker melodiie

[p. 76]

☞ Een ander,

Op de wijse: Alsoo’t beghint.

VVIlt nu al veriolijsen
Ghy die vrede begheert,
Ons is naer schrifts bewijsen
Een kint gheboren weert,
Prince van peyse machtich:
Looft hem minst ende meest:
Wy zijn bevrijt waerachtich
Vander hellen tempeest.

Prince, etc.

[p. 77]

 

Een Conick is ghesproten

 

Voor ons, uyt Dauidts saet,

 

Met liefden ouergoten,

 

Voor ons, die obstinaet

 

Gheheel waren verloren,

 

T’samen wijf ende man:

 

Hy is mensche gheboren:

 

Verlost is ‘smenschen stam.

 

Gheheel, etc.

 

T’serpent is bu verbeten,

 

Versoent is onsen val:

 

En wilt hem niet vergheten:

 

Looft hem ghy menschen al:

 

Heylich is sijnen name,

 

Soo Schrifture ghewaeght:

 

Looft oock door hem bequame

 

Sijn Moeder ende Maecht.

 

Heylich, etc.

 

Looft Maria ghepresen,

 

Met haren kinde soet:

 

Wt haer soo is gheresen

 

Iesus Godts Sone vroet:

 

Deur heylicheyt recht-veerdich,

 

Hy heeft den peys ghemaeckt:

 

Wy warens heel onweerdich,

 

Van alle deuchden naeckt.

 

Deur, etc,

 

Looft den naem’ vanden kinde,

 

Tis een regeerder sterck,

 

Ootmoedighe ghesinde,

 

Looft hem en s’werelts perck:

 

Hy is ‘tbeghin en ‘t ende

 

Godts Gheest die is ghedaelt

 

Op hem, en ons amende

[p. 78]

 

Heeft hy voor ons betaelt.

 

Hy is, etc.

 

Och edel kindt verheuen

 

Ontfanght lof-sanghen schoon,

 

Die wy v t’samen gheuen,

 

In dijn hemelsche throon:

 

Ghy hebt op der eerdem

 

Wt liefde wel bedocht,

 

Een vat van kleynder weerden

 

O Heer’ so dier ghekocht.

 

Ghy, etc.

 

Prince aensiet van bouen

 

Ons menschen ionck en oudt,

 

Die v al t’samen louen

 

Met tonghen menichfout:

 

Want voor ons sondaechs teere

 

Hebt ghy den wech bereydt:

 

V zy lof, prijs, en eere,

 

Tot inder eeuwicheydt.

 

Want, etc.

Selden tijt sonder strijt.