Het prieel der gheestelicker melodiie
(1617)–Anoniem Het prieel der gheestelicker melodiie–
Auteursrechtvrij
[pagina 73]
| |
EEn Seraphinsche tonghe
My nu wel dient voorwaer,
Een kele die wel songhe
Met soete stemme klaer,
Om t’kindeken soo kleene,
Gheboren soomen siet
Van eener maghet reene,
Te louen met een liedt.
Om, etc.
Sijn twee bruyn ooghkens schoone,
En sijn mondeken root,
Sijn ledekens idoone,
Sijn handekens minioot,
Die tooghen ons de wegehen
Die wy moeten ingaen:
Op dat wy al den seghen
Van hem moghen ontfaen.
Die, etc.
Sijn lief aenschijn ghepresen,
Sijn graci’ aldermeest
In sijn kinderlijck wesen,
Verheucht my inden gheest:
En soo ick wel aenschauwe,
Hy is gheheel ghelijck
Sijn moeder onse Vrauwe,
In goe manieren rijck.
En, etc.
Ghe-eert zy dan de moeder
Nu en t’allen termijn,
| |
[pagina 74]
| |
Die ‘tkint onsen behoeder
Ghebaert heeft sonder pijn:
Glori’ zy Godt ghegheuen,
Den menschen peys al hier
Die op der aerden leuen
Van wille goedertier.
Glori’, etc.
O Iesu soeten naeme,
Ons troost, ons toeuerlaet,
Ons verlosser bequaeme,
Aenmerckt ons simpel daet:
Wilt door v liefd’ aenveerden
Ons herte voor present:
Al zijn wy kleen van weerden,
O Heer’ tis v bekent.
Wilt, etc.
Leght Tolle naer recht. |
|
