Het prieel der gheestelicker melodiie

☞ Een ander,

op de wijse: Alsoo ‘t beghint

Homo postquam Domini verbum violauit,
Cordibus ex hominum Deus exulauit,
Orci tunc mancipium terrae dominatur;
Homo terrae Dominus, Orco mancipatur.

Turba Patrum carcere tetro liberanda,

Veni Iesv, geminat voce miseranda:
Caeli terrae gremio distillate rorem;
Terra rore grauida, edat Saluatorem:

Veni Sponse regie thalamo regali,

Increate nascere, ventre virginali;
Ecce, terra germinat de radice Iesse;
Qui terrarum incolis cunctis vult prodesse.

Sed quodnam palatium terra praeparauit

[p. 54]

 

Illi, qui sidereas sedes habitauit?

 

En tibi praesepium, veri Salomonis,

 

Vile nimis solium; Quanti Regis thronus.

 

Qui dat celi auibus nidulos plumarum;

 

Eligit pro lectulo, foenum bestiarum:

 

Quique terrae dominis splendidum dat tectum;

 

Vile capit stabulum, pluuijs subiectum.

 

Huc Adae progenies gressibus contende:

 

Hic Doctorem gentium sedulo perpende:

 

Cubans in praesepio sedis magistralis;

 

Vos condemnat auidos solij regalis

 

Damnat, & circumdatus pannis sordidatis,

 

Vos qui terrae viscera auro spoliatis.

 

Sic caelorum Gloria foeno occultatur;

 

Caro, foeno similis, de quo gloriatur?

 

Si Maiestas tegitur sub humanitate;

 

Nostra quid humanitas gaudet maiestate?

 

Si, qui terram procreat, vult extenuari;

 

Cur, quem terra procreat, cupiet inflari?

 

Cur, qui vallem fletuum incolit, laetatur:

 

Dum Caelorum gaudium, lacrymis rigatur?

 

Dum Maria filium vidit lacrymari;

 

Cor doloris gladio coepit vulnerari;

 

Cumque satis filium nequit admirari,

 

Verba miscens lacrymis, incipit effari:

 

Fili, quid lacrymulas fundis ab ocellis,

 

Qui moeroris nubila cordibus expellis?

 

Poteras in regijs te fovere lectis,

 

Cur iaces hic frigidus laceris sub tectis?

 

Poteras delitijs diues satiari,

 

Cur de matre paupere cupis generari?

 

Hęc dum plorans loquitur, natum stringit vlnis:

 

Natus dulci gaudio Matris sanat vulnus,

 

Luctum, & laetitiam pij dant amores;

[p. 55]

 

Dolor pellit gaudium gaudium dolores,

 

Sic Maria laetior nato consolante,

 

Consolatur filium, vbere manante.

 

Pia Mater alteri iunge me mamillae:

 

Vt cum Iesv nutriar tam suaui melle:

 

Vt cum Iesv nutriar lacte paupertatis:

 

Vt cum Iesv fugiam fumos vanitatis;

 

Vt cum Iesv gaudeam hic humiliari;

 

Vt cum Iesv merear tandem coronari. Amen.