Het prieel der gheestelicker melodiie

[p. 17]

☞ Een Gheestelijck Liedeken van den Aue Maria.

Op de vvijse: alsoo’t beghint:

AVe der Maechden kroone,
Maria weest ghegroet,
Klaer als de Sonne schoone,
Ghy zijt vol gracy’ soet,
Deur v ons de deucht toevloet,
Want ghy hebt met diep ootmoet
Ghebaert ons t’hoochste goet.

Deur, etc.

Den Heer’ is met v reyne,

[p. 18]

 

O vreucht des werelts wijt,

 

Och troostbare fonteyne,

 

Ghy zijt ghebenedijt:

 

Want noyt mensch tot gheender tijt,

 

Was soo salich als ghy zijt:

 

Deur v zijn wy bevrijt.

 

Want, etc.

 

Ghedanckt, ghelooft, ghepresen

 

Moet zijn den weerden pant,

 

V vrucht reyn uytghelesen,

 

Iesus v kindt plaisant:

 

Die ons als een Leeu vaillant

 

Heeft ontdaen den helschen bant,

 

Deur sijne machtighe hant.

 

Die ons, etc.

 

Maria hooch gheboren

 

Wt Coninck Dauidts saet,

 

Laet ons doch niet verloren,

 

Ghy zijt ons toeuerlaet:

 

Siet wy sijn hier desolaet,

 

En veruult met alle quaet,

 

O ras komt ons te baet.

 

Siet etc.

 

Lof moeder der ghenaden

 

Sy v in’t aertsche dal:

 

Wee hem die v versmaden,

 

Fy ketters valsch getal:

 

Wilt ons doch bevrijden al

 

Van der ketters boos gheschal,

 

En vanden helschen val.

 

Wilt, etc.