Politieke balladen, refereinen, liederen en spotdichten der XVIe eeuw

[p. 311]

Bescryvinghe van een waerachtich Geus.

Mijn nature veranderinghe heb'ic ghedroncken,
Uut Babels cop, my van Orange gheschoncken.
Mijn ooghen blakende tooghe ic met schande;
Deur my heeft Vlaenderen ghestaen in brande.
Een wulfs mule heb'ic om mijn verzoetsele,
Van 't vleesch der onnoosel schapen nem'ic mijn voetsele;
Esels ooren my wel staen deur mijn plomp en bot vercreten,
Draghende zwaer lasten en noch werdic ghesmeten.
Int schijn van schaeps cleeren, alzo schrift heeft voorzeyt,
Bedrieghe ic d'onnoosele int schijn van helicheyt;
De wercken mijnder hooverdien claerlic tughen,
Onder Godt ofte Conynck en wildick noyt bughen;
Hasen voeten heeft men my willen jonnen;
In 't voorloopen heb ic allomme prijs ghewonnen.
Den steert van eenen ael voere ic, met subtylen liste,
Waer ic oynt quam maect'ic oorloghe en twiste;
Ic draghe een slanghen tonghe, naer Davids oorconden,
Het fenijn der blasphemien wert deur my ghesonden.
Eenen vos es my in 't herte verleent,
Schoon can ic spreken en hebt noynt ghemeent.
Met den struus verteeric 't al, stellende mijn macht boven
Isere, tee, metael, steen, cloosters, gheheel pachthoven;
Mynen buuck ghelijck de helle, wilt alle waken:
Het uutcommen valt zwaer, maer zoet het ingheraken.

1584.

Louys Heyndricx.