|
| |
| |
| |
Balade.
Lestens droomde my daer ick lach en sliep,
Dat Lucifer t'sijnder poorten uutriep
Een vry gheleye voor heeren en vrauwen,
Dat elck zau commen op vast betrauwen,
Alle die helle was vry gheleye,
Elck moght commen bezien die heele contreye.
Dus liep 't volck derrewaerts met grooten ghetale;
Ick liep oock mede, docht my, tot in de zale,
Daer zach ick wondere groot boven maten,
Het zatt daer al vol Guessche soldaten,
Schelmen, moorders en beelde-schinders,
Kerckroovers die ghemaect hebben veel schamel kinders,
Apostaten, ministers met haer valsche doctrine,
Boer-straffers, piraten, lantloopers ten syne,
Paep-eters, sacramentschenders en maeghdevercrachters,
Van God en zijn helighen sprekende veel lachters.
Hiermede waude Lucifer gaen hauden zijn feeste;
Om dat elc duvel zau bly zijn van gheeste
Zoo hadde hy den Helschen Beer gheslaghen,
Doen moesten die cleyn Duvelkens al peinsen draghen
Al die weerelt duere an
Calvinus ghesellen,
Ic en zau dwonder niet al connen vertellen,
Den last die zaude my veel te zwaer zijn,
Zy zijn zot die ghelooven dat droomen waer zijn.
| |
| |
Ic zach
Brederode gaen met
capiteyn Wust,
Zy ghynghen door d'helle zeer ongherust;
Doen sprac den eenen: ‘Eylacen, ahe!
Waer vinden wy onsen goên vrient
Lume?
Hy waer hier ter feesten quaet vergheten,
Hy plach zoo gheerne bloetdaermen t'eten.’
‘Hy zal wel commen,’ sprac Lucifer, ‘naer den ghuer.’
En terstond quam hy met Conde daer vuer,
Dies elc hem vraeghde daer up dat pas
Oft
Graef Jan van Ghendt niet commen en
was.
Doen zeyde Lucifer: ‘Ic hebber om ghezonden,
Ic zaude hem zelve halen, waer ic ontbonden,
Want 't is voor my een groot vercleenen,
Hy zaude my den schadt van kercken en cloosters leenen,
Daer zaude ic een erfve mede coopen hier in 't ghemeyn,
Want die helle die wert ons noch veel te cleyn
Om myn feeste te hauden, dies ic verflauwe;
Dan wacht ic
Casimirus met
Willeken van Nassauwe,
Met zijn huusvrauwe, een gheprofeste nonne,
Ende oock de Weerdinne in de Roose te Lonnen,
Die 't volck zoo dicmael hebben bedroghen,
't Es dicwils waer al schijnhet gheloghen.
Door dit droomen docht my dat ic sach wondere,
Als ic ging kijcken boven ende ondere,
Zoo en was
graef Lodewijc daer niet vergheten,
Hy att ooc peinsen daer hy was gheseten
Met
graef Adolph ende zijn adherenten,
Die ooc gheweest hadden des weerelts regenten;
| |
| |
't Quam daer al ter feesten, was't vet oft maghere,
Maer daer ghebrack
Ryhove, den alaermslaghere,
Die mocht zijn trommels doen slaen om danssen.
Doen sprac
capiteyn Bouck tot die groote
Hanssen:
‘Het volck is te vele hier boven maten,
Hoe zullen wy
Zonnevelt connen inne ghelaten,
Ende onzen vrient capiteyn Mijghem
eersaem;
Zy hebben in 't rooven en moorden haer beste wel ghedaen,
't Waer jammer dat zy beide bleven hier buten.’ -
‘Men zal ze best in den peck-kelder sluyten,
Want al es Mijghem van moorden t'Antwerpen
ghevanghen,
Ende Zonnevelt van
Lamote commen in verstranghen,
't Waer jammer, zeg' ic, al zijn zy in boosheit verblent
Dat zy niet waren onder ons helsche regiment.’
Sprac Lucifer, met allen zynen raet,
Dies niet en ghelooft en doet goet noch quaet.
Doen wasser eenen wysen raedt ghehauden,
Hoe dat zy meester
Pieter Dathan inhalen zauden,
Upperste bisschop van Ghendt, niet om verstranghen,
Naer zijn presentie heeft elc duvel verlanghen
Met Jacobum, Joannem en ander daer zeer verheven,
Ende
Beza, haer paus, God van
Geneven,
Die zal in den gloeyenden zetel zeer wel micken,
Daer zal hy slanghen ende padden slicken,
Die hebben wy met tonnen uut Indien bracht,
Dan oock graef
Jan met Hollac hier up wacht
Om heurlien te brynghen in de helsche gronden.
Dies verwachten wy oock mijnheer van
St. Aldegonde
| |
| |
Met meester
Pieter De Rijcke, een groote
roffiaen,
En de Achthien Mannen met
capiteyn Bernaert volghen aen,
Ende
Marneau met
Tempel te Brussel
gheseten
Met de Adels van Ghent dienen hier niet vergeten,
Mits oock haeren crijchraet al Ghues- en Hembijs-ghesint.
Doen quam Judas haer vader Lucifer ontrint
Ende heeft hem een rolle in zijn handt ghegeven,
Daer alle zijn vrienden stonden hinne gheschreven,
Die ghynck men alomme rustich formeren;
Men magh allen droom wel wat stofferen.
|
|
Auteursrechtvrij