Parnassus, dat is den Blijen-bergh
(1623)–Anoniem Parnassus, dat is den Blijen-bergh–
AuteursrechtvrijOp de wijse: Den gheestelijcken Mey Christus playsant.Devote Catholijcken alle ghemeyn,
Laet vreucht in u herte voncken,
Want Christus onsen Heere en bruydegom,
Sijn lieve Bruydt heeft gheschoncken,
Eenen schoonen welrieckenden Meyboom
Die nu van Helena ghevonden is
Op Calvarien die contreye,
Is ghehaelt desen groenen Meye.
Al was hy vanden Ioden neder gheslecht,
En begraven inder eerden,
Die Catholijcke Kercke heeft hem op gherecht,
Hoogh verheven met grooter weerden,
Om dat ons soo grooten weldaet is gheschiet,
Aen den Heylighen Meyboom des Cruycen siel,
| |
[pagina 159]
| |
Hier beneden in dese valleye,
Eeren wy desen groenen Meye.
Boden alle boomen in’t aertsche dal,
Die uyt der aerden groeyen,
Is desen Meyboom weerdich boven al,
Door die crachten dien uyt hem vloeyen,
Om dat hy besprenght is met Iesus bloet,
Soo heeft hy welrieckende bloemen soet,
En schoon vruchten menichderleye,
Ontfanghen wy van desen groenen Meye.
Hierom devote siele u ooghen opslaet,
En wilt neerstelijck aenmercken,
Waer desen groenen Meyboom gebloeyet staet
Inden boomgaert der Heyligher Kercken,
Daer is hy van Christyo gheplant en ghebracht,
Daert eetmen sijn vruchten, daer toont hy sijn cracht
In die schoone wellustighe weye
Sult ghy vinden desen groenen Meye.
Weerdich is desen Meyboom des Cruycen fier,
Die wy alsnu ontfanghen,
Siet wy aenbidden hem met weerdicheyt hier,
Om dat Christus daer aen heeft ghehanghen,
En veur ons ghestorven die bitter doot,
Soo is hy van deuchden en crachten groot,
In alle droefheydt en gheschreye,
Is zeer troostelijck desen groenen Meye.
Prince.
O Princelijcken Bruydegom triumphant,
Lof moet u eeuwich wesen,
Die u beminde Bruyt nu hebt gheplant,
Desen Heylighen Mey ghepresen,
Die nu staet ontloken en schoone verciert,
Wiens feestdach die heylighe Kercke nu viert,
Met spel en lof-sanghen beye,
Dancken wy u vvan desen groenen Meye.
|
|