Parnassus, dat is den Blijen-bergh

[p. 141]

Een nieu gheestelijck Leysliedeken.

Op de wijse: Fit porta Christi peruia.

Ons is een kint gheboren fris,
Hem eeren wy // met melody,
Den soson die ons ghegheven is,
Looft hem met herten bly,
Want hy sal ons maken vry,
Van des duyvels tyranny,
Daerom is hy ghecomen hier,
Dus looft den Heer // met herten seer
Die veur ons is soo goedertier,
Tot hem neemt uwen keer,
Gheeft hem lof hoocheydt en eer,
Desen jonghen Coninck teer.

Hy is ons salichmaker goedt,

Dus weest verblijt // wie dat ghy zijt,
Ons Coninck en ons leydsman zoet,
Looft hem tot alder tijt,
Met lofsanck, vreucht en Iolijt,
Desen Soon ghebenedijt.

Hy sal regneren eeuwelijck,

Aenbidt hem al // in’t aertsche dal,
In Iacobs huys in Davids rijck,
Looft hem met bly gheschal,
Die ons vanden grooten val,
Wederom oprichten sal.

Van die toecomende werelt claer,

Is hy certeyn // een Vader reyn,
Een Prins des vreeds is hy veurwaer,
Dus looft hem al ghemeyn,
Met lofsanck in’t aersche pleyn,
Onsen Godt is hy alleyn.

[p. 142]

 

Seer wonderlijck is sijnen naem,

 

Ons looft hem snel // met Hemels spel,

 

Een sterck Godt is hy bequaem,

 

Leydsman van Israhel.

 

Laet ons doen na sijn bevel,

 

Want hy is Emanuel.

 

Eeuwich wordt nu sijn eer verclaert,

 

Met loff en prijs // den Coninck wijs,

 

Die ons een maghet heeft ghebaert,

 

Looft hem nae // advijs,

 

Want hy is een soete spijs,

 

Veur de ziele seer propijs.