Parnassus, dat is den Blijen-bergh
(1623)–Anoniem Parnassus, dat is den Blijen-bergh–
AuteursrechtvrijOp de wijse: Ghevet Sinte Marten, &c.Tot vreuchden wilt ontspringhen,
Weest blij ghy droeve naci,
En wilt nu vrolijck singhen,
Met soete Iubilari,
Want nu den tijt en spaci,
Dunckt my bequame zijn,
Wy crijghen recreaci,
Deur den edelen coelen wijn.
Den wijn is goet en crachtigh,
Men moet hem dier betalen:
Cooplieden rijck en machtigh,
Doen hem van verre halen,
Men drinckt hem sonder falen
Vyt ghelas oft cristelijn,
Vyt coppen ofte uyt schalen,
O den edelen coelen wijn.
Hierom soo wilt aenmercken
Wat dat den mijn can maken,
Miraculeus van wercken
Is hy in vele saken,
| |
[pagina 120]
| |
Die hem te recht ghenaken,
Sijn reuck is medicijn,
Wel haer die moghen smaken,
O den edelen coelen wijn.
Die seer oudt zijn van daghen,
Die maeckt hy jonck van jaren,
Die altoos kermen en claghen
Doet hy vreucht openbaren,
Die vreckigh zijn in sparen,
Die maeckt hy milt en fijn,
Dit comt al deur den claren
Edelen rinschen coelen wijn.
Die stomme die hem drincken,
Die doet hy praten en singhen,
Die creupel en manck gaen hincken
Hy doet haer dansen en springhen,
De arme in alle dinghen,
Sijn rijck op dat termijn,
Van cleeren, gelt en ringhen,
Deur den edelen coelen wijn.
De fatste vanden lande,
Die maeckt hy wijs als Heeren,
Die plomp zijn van verstande,
Die can hy lichtelijck leeren,
Haer sprake doet hy verkeeren,
In Francoys, Spaens oft Latijn,
Dus hout hem wel in eeren,
O den edelen coelen wijn.
De wijse maeckt hy dwasen,
Soo groot is hy van crachten,
Die altoos volle ghelasen,
En groote schalen machten
Sy vallen in slooten en grachten,
In modder soo dick als bryn,
Dan hoort men groote clachten
Vanden edelen coelen wijn.
| |
[pagina 121]
| |
Nochtans wordt hy ghepresen
Vande mannen eersame;
Den vrouwkens uyt-ghelesen
Is hy oock aenghename,
Wanneer sy ligghen in crame
Al achter de gordijn,
Dan is haer seer bequame
O den edelen coelen wijn.
Dus vrindekens altemale
Aensiet den coelen wijn blincken:
Drinckt vry een volle schale,
Hy sal wel neerwaerts sincken;
V keelken dat sal klincken:
Om te singhen een Liedeken fijn
Met vreughden moetmen drincken
O den edelen coelen wijn.
Laet ons den Prince loven,
Die Noe eerst openbaerden,
Vyt den Hemel van boven,
Hoe dat hy de wijngaerden,
Sou planten inder aerden,
Teghen den sonnen schijn,
Dus houdt hem wel in waerden,
O den edelen coelen wijn.
N.I. |
|