Ontmoeting. Jaargang 13

[p. 105]

Lorenz Schultz
Herfsreis deur Holland

I

Heer, die tyd het weer gekom
van sterwe vir die groot gousblom.
Die wolke met hul somber vragte
gly onmerkbaar-langsaam van hul oewers los.

Aan die heuwelhange swel die druiwetros.
Skenk hom nog net drie warm nagte,
sodat hy soet word met die suiker van 'n moederbors -
Heer Jesus, les my dors.

[p. 106]

II

Messelaar, ek het geen huis - sal nooit, miskien een bou
en sal nog heel lank eensaam bly.
Teken nou 'n dak oor my,
of ek moet doelloos heen en weer -
'n droë blaar - voor die blou
wind deur die kaler lanings skeer.
Heer, teken nou U Kruis oor my.

[p. 107]

III

Ek sien, Jesus, U voete weer
soos toe U nog 'n jong seun was,
en hul bly gehuppel het in nat, groen gras -
hoe verward was hul toe in my hare, Heer!
Nou is hul geen voete meer
maar kleinwild, opgejaag in 'n doringbos -
Heer, maak U voete uit my hare los!