Ontwaking & Nieuw Leven. Nieuwe reeks. Jaargang 10 (1910)

Ontwaking & Nieuw Leven. Nieuwe reeks. Jaargang 10

(1910)– [tijdschrift] Ontwaking– rechtenstatus

Gedeeltelijk auteursrechtelijk beschermd

Maandschrift voor sociologie, kunst en wetenschap

Vorige Volgende



[pagina 59]
Vergeten Bladzijden Een nyeu liedeken 1. Wi meyskens net, schoon gheblancket die gaerne vruecht hantieren Wi zijn verplet, in Venus bruywet Niemant en wilt ons nv vieren dat heeft ghedaen Ons cussen ons lecken, ons boerden ons gecken ons drincken, ons clincken, ons roepen ons wincken Het cost ons so menighen traen Voor cort iolijt, een lanc verwijt Ons vruecht die mach haest vergaen Ons vruecht die mach haest vergaen
2. Om dat wi eens, al binnens beens Speelden met venus brande Met luttel gheweens, certeyn ic meens Bleef onsen maechdom te pande dat heeft ghedaen Ons cussen ons lecken, ons boerden ons gecken ons drincken, ons klincken, ons roepen ons wincken Ist nv niet qualijc ghemaect den buyc is groot, dat is den noot Wi zijn aan een kint gheraect Wi zijn aan een kint gheraect
3. Dan claghen wi snel, met groot ghequel Ons moeder om troost te verweruen dan antwoort si fel, een dubbel vel Een hoerken sult ghi steruen dat heeft ghedaen Ons cussen ons lecken, ons boerden ons gecken ons drincken, ons schincken, ons roepen ons wincken
[pagina 60]
Wat wilt ghi claghen mi dan gaen wi dolen, wat batet verholen Niemant en ontsegghen wi Niemant en ontsegghen wi
4. Dus treden wi voort, hoort dit appoort Ende crijghen voor ons ghelucken die pocken aent boort, ende worden gesmoort So dat wi dansen op cruycken dat heeft ghedaen Ons cussen ons lecken, ons boerden ons gecken ons drincken, ons klincken, ons roepen ons wincken dus worden we cruypel ende manck Ons vrienden ons magen, wi luttel behagen dus eyndt ons leuen cranck Dus eyndt ons leuen cranck
5. Eens waren wi ient, al omme bekent Tot allen feesten om drucx vernielen Nu ist gewent, wi zijn geschent Ende schoeyen metten fielen dat heeft ghedaen Ons cussen ons lecken, ons boerden ons gecken Ons drincken, ons clincken, ons roepen ons wincken daer crijghen wi menighen waert Van lande te lande, dan clappen on standen Ende menighen couwen haert Ende menighen couwen haert
6. Dus worden wi lau, in 't werck seer flau Verleept ende afgebraeyen die tanden grau, die lippen blau dan moeten wi coppelen draeyen dat heeft ghedaen Ons cussen ons lecken, ons boerden ons gecken Ons drincken, ons clincken, ons roepen ons wincken Ghewreuen is onsen struyck die mammen zijn plat, als een scotel doec nat Si hangen op onsen buyck Si hangen op onsen buyck

[pagina 61]
7. Dus sietmen ons rijen, doort niet bedijen. Om gode al voor die kercken Ons boelkens daer lijen, met tween met drien Si en wiilen op ons niet mercken dat heeft ghedaan Ons cussen ons lecken, ons boerden ons gecken Ons drincken, ons schincken, ons roepen ons wincken Elck wijst ons met vingheren naer Pouer dat bijt ons, aermoede smijt ons Het valt ons veel te swaer Het valt ons veel te swaer
8. Ons leste huys, is met een cruys Niemant en derffer na haecken Dan zijn wi confuys, tis een abuys daer leeren wi luysen craecken dat heeft ghedaen Ons cussen ons lecken, ons boerden ons gecken Ons drincken, ons clincken, ons roepen ons wincken Hier toe so comen wi bloot Vol seren vol schellen, vol sweeren vol bellen daer steruen wi inden noot daer steruen wi inden noot
9. Princerskens fier, ient in bestier die noch zijn maechdekens reijne Wacht u voor tvier, der liefden hier Ende slaept noch vrij alleyne Ende wacht ons toch Voor cussen voor lecken, voor boerden voor gecken Voor drincken, voor schincken, voor roepen voor wincken Weest eerbaer in uwen mont Wiet ander doet, ick maect v vroet Het sal v berouwen terstont Het sal v berouwen terstont.

Vorige Volgende