Ons Erfdeel. Jaargang 33

[p. 649]

Elisabeth Eybers

Afstand

Under the hollow roof
The strangers' voices come-
The night is dark, and I
Am far from home.

Walter de la Mare

Van tyd tot tyd nog steeds die vreemde vraag:
jy - meestal u - het langsaamaan wel tuis
geraak in hierdie land?
Ek neurie nie die nag
is donker ek is ver van huis
maar knik welmenend vaag
en vals. Ek wortel elders, hoe sou ek my hier
kan tuis maak. Dinge en ek gaan aan mekaar verby
sonder herkenning. Daarom laat hulle my
met rus, versin geen hinderlaag, lê nooit beslag
en daarom kan ek hulle goed verduur.

Uit: Kruis of munt.

[p. 650]

Stemming

Weer herfs - hoeveel nog? - en ek trek my
terug in 'n tweekamerspeelruim:
ingeslote en vry.
Weelde van heimwee, daar buite
afwerende beelde, die ruite
beslaan met 'n wolkestolsel,
sintvitusgebare van bome
wat oggend vin oggend verslonsder
ontsnap uit die woekerende nag.

Geruisloos sypel die sand...

Verlede: seisoen van versuim

Hede: dag van bestand

Toekoms: die dag ná vandag.

Uit: Bestand.

[p. 651]

Deesdae

Die muse skyn my deesdae te vermy.
Niks aan te doen. Geduldig verder gaan.
My kleinseun - vijf-en-'n-half - en ek verstaan
mekaar. Laat maar, want jij bent oud sê hy

wanneer ek blyk van onbehendigheid
by die saamstel van 'n speelgoedhyskraan gee.
Hy wil gaan fiets. Dit reent. Je hoeft niet mee,
dan wordt je haar zo nat. Dis geen verwyt.

Die dae wedywer om hom te laat gedy,
elke kontoer word liefderyk afgerond,
gepoets, albasterglimmend en gesond.
Die dae het iets anders voor met my.

Wat ben je stil vandaag. Geboë oor
sy lego eis hy meer geselligheid.
Ek sing 'n liedjie uit my kindertyd.
Ben jij vra hy beleef ook lid van het koor?

Hy sê opeens het duurt nog héél héél lang
voor jij doodgaat - nog meer dan honderd dagen.
Gulheid oorskry sy rekenkunde, skraag en
vertroos ons, maak ons bly en amper bang.

Uit: Dryfsand.

[p. 652]

Miskien

Die saaiste deugde wat jy kan bedink
- uithouvermoë, selfontsegging - blyk
ten slotte dwingend, kan nie meer ontwyk
word wanneer elke tinteling versink.

Onwrikbare voorbeskikking kom straks uit,
die allesweters wis tóg, sal jy sien
sodra jou sin en sintuie faal. Miskien
is dit God self waarop jy eindelik stuit:

die hiëroglief vir alles wat begrip
en definisie uittart en ontglip.

Maar wat vir jóú aan hierdie denkbeeld raak
het iets met liefde en met musiek te maak.

Uit: Rymdwang.