Die nuwe brandwag. Tydskrif vir kuns en lettere. Jaargang 1933

[p. 37]

Seegeruis.

Gee ons die rus - die branders ruis
hul lied en sing
herinnering
in ewig-diep en swaar gedruis
hier om die donker eensaam huis.

Gee ons die rus - al bring die wind
bo branderlied
uit ver verskiet
'n ewigheid waarin ons vind
ons heimweedrome as 'n kind.

Gee ons die rus - of raak ons aan
sag met U kleed,
dan sal ons weet
om soos die see daar voor die maan
getrou ons ritmeweg te gaan.